یه‌كێتی و پارتی له‌هه‌ولێر كۆده‌بنه‌وه‌

PUKMEDIA

لۆگۆی یەکێتیی نیشتمانیی کوردستان و پارتی دیموکراتی کوردستان

ئه‌مڕۆ سێ شه‌ممه‌ 16ی12ی2025 كۆبوونه‌وه‌ی یه‌كێتیی نیشتمانیی كوردستان و پارتی دیموكراتی كوردستان له‌هه‌ولێر به‌ڕێوه‌ده‌چێت و كۆبوونه‌وه‌كه‌ش درێژكراوه‌ی كۆبوونه‌وه‌كانی رابردووی نێوان هه‌ردوولایه‌ به‌مه‌به‌ستی پێكهێنانی حكومه‌تی نوێی هه‌رێمی كوردستان.

چه‌ند رۆژێك پێشتر سه‌عدی ئه‌حمه‌د پیره‌ ئه‌ندامی مه‌كته‌بی سیاسی یه‌كێتیی نیشتمانیی كوردستان رایگه‌یاندبوو: له‌ ناوه‌ڕاستی ئه‌م هه‌فته‌یه‌دا یه‌كێتی و پارتی بۆ پێكهێنانی حكومه‌تی نوێی هه‌رێمی كوردستان كۆدەبنه‌وه‌و كۆبوونه‌وه‌كه‌ش درێژكراوه‌ی كۆبوونه‌وه‌كانی رابردوو ده‌بێت كه‌ له‌نێوان هه‌ردوولا هه‌بوون.


ئه‌مه‌ش له‌كاتێكدایه‌، رۆژی 23ی11ی2025، قوباد تاڵه‌بانی جێگری سه‌رۆكی ئه‌نجومه‌نی وه‌زیرانی هه‌رێم له‌كۆنگره‌یه‌كی رۆژنامه‌وانیدا ئاماده‌یی یه‌كێتی بۆ ده‌ستپێكردنه‌وه‌ی گفتوگۆكانی پێكهێنانی حكومه‌تی هه‌رێم راگه‌یاندو وتی:"ئێمه‌ وه‌ك یه‌كێتیی نیشتمانیی كوردستان له‌گه‌ڵ برایانی پارتی له‌ گفتوگۆدا بوین تا كاتی گه‌رمه‌ی بانگه‌شه‌ی هه‌ڵبژاردن و ئێستاش ئاماده‌ین ده‌ستپێبكه‌ینه‌وه‌ بۆ پێكهێنانی كابینه‌ی نوێی حكومه‌تی هه‌رێم".

له‌ باره‌ی پێكهێنانی حكومه‌تی نوێی عیراقیش، قوباد تاڵه‌بانی رایگه‌یاند: پێویستمان به‌گفتوگۆیه‌و پێویسته‌ هه‌موو لایه‌نه‌كانیش به‌شدار بن هه‌تا بتوانێت خزمه‌تكارێكی باشی خه‌ڵك بین به‌گشتی.

ئەمەش لەکاتێکدایە، دوای بەڕێوەچوونی هەڵبژاردنی خولی شەشەمی ئەنجومەنی نوێنەرانی عیراق، رۆژی 1ی12ی2025 یه‌كێتیی نیشتمانیی كوردستان و پارتی دیموكراتی كوردستان له‌هه‌ولێر، یەکەم کۆبوونەوەیان له‌باره‌ی پێكهێنانی حكومه‌تی نوێوه‌ ئەنجامدا، بڕیارە ئەمڕۆش دووەم کۆبوونەوە لەبارەی پێکهێنانی حکومەتی نوێوە لەنێوان یەکێتی و پارتیدا لەهەولێر بەڕێوەبچێت.

PUKMEDIA