قوباد تاڵەبانی و بڕیارێکی بەرپرسیارانە

PUKMEDIA

لەتیف نێروەیی

کاتی خۆی یەکێک لە رێنمایی و ئامۆژگارییەکانی سەرۆك مام جەلال لە کۆبوونەوەکانیدا لەگەڵ رۆژنامەوانانی یەکێتی، هەمیشە هەر ئەوەبوو، كە دەیووت: وەڵامی هیچ کەسێک مەدەنەوە كە لەسەر من دەنووسێت یان رەخنەم لێدەگرن، ئەگەر رەخنەکانیان راست بێت سوپاسیان دەکەم و ئەگەر راستیش نەبێت خۆم بەنووسین وەڵامیان دەدەمەوە و هەڵەکانیان بۆ راستدەکەمەوە، ئەم فەرهەنگە دەوڵەمەندەی سەرۆك مام جەلال بەئێستاشەوە کاریگەری بەسەر بەشێکی زۆر لە رۆژنامەنووس و دەستەبژێری یەکێتی هێشتووەتەوە.

 بۆیە زۆرجار کاتێك هەڤاڵێکی یەکێتی لەهەر پلە و پایەیەکی حزبی یان حکومی بێت و  رووبەڕووی ئەرکێکی سەخت ببێتەوە، یان بکەوێتە بەر شەپۆلێکی فراوانی رەخنەی ناهەق و توندی میدیای تەقلیدی و میدیای نوێی لایەنێکی رکابەر، ئەو هەڤاڵە تاڕادەیەک بەتەنیا لە گوڕەپانەکە دەمێنێتەوە و تەنها خۆی بەرگری لەخۆی و بۆچوونەکانی خۆی دەکات، راستییەكەشی هەڤاڵ قوباد تاڵەبانی یەکێکە لەو هەڤاڵانەی کە بەهۆی ئەرکە حکومییەکەی زۆر جار رووبەڕووی رەخنەی ناخۆڕسک و ناهەقانە بۆتەوە، بەڵام وەک خۆی دەڵێت نابێ لە رەخنە بترسین.

لێرەدا دەخوازم بڵێم هەلومەرج و سەردەمەکان گۆڕاون، جاران رەخنەگرەکان لەرێی سەرچاوە میدیاییە رەسمییەکانەوە رەخنەیان دەگرت، ئامرازی بڵاوکردنەوە و گەیاندنی رەخنەکان خاوەندارێتی رەسمییان هەبوو، پەیامەکان دەرگاوانیان هەبوو، رەخنەکان جددی و بابەتیانە بوون، بەڵام لەم سەردەمەدا لە ماوەی یەک چرکەدا دەکرێ لەرێی سوپای ئەلیکترۆنیەوە و بە ئیعازی کەسێک یان لایەنێک و بۆ ئەجێندایەکی شەخسی و ناوزڕاندنی کەسێک ، هەزاران كەس پێکەوە و بەیەک کلیک رەخنە،  یان هێرشێكی مەرامداری دروستکراو لەرێی دەیان سەرچاوەی میدیای نوێوە بڵاو بکرێتەوە و ئامانجی سەرەکی لەو رەخنە دەستکردو ناخۆڕسکە بۆ بەئامانجگرتنی  کەسێک یان لایەنێکی دیاریکراو، بۆیە گەرەکە  لەم سەردەمەدا  لەسەر رەخنە ناخۆڕسکەکان، بەرگری لەهەڤاڵەکانی خۆمان بکەین و بەتەنیا لە گورەپانەکە بەجێیان نهێڵین و کاتێ کارێکی باشیش دەکەن  دەست خۆشیان لێ بکەین .

کارەساتە سروشتییەکەی دەڤەری چەمچەماڵ کە یەکێک بوو لەکارەساتە سروشتییە کەم وێنەکانی هەرێمی کوردستان، لە دۆخ و کاودانێکی یەکجار دژواردا روویدا، ئەرکێکی یەکجار سەخت و گران کەوتە سەرشانی هەڤاڵ قوباد تاڵەبانی، یان ئەگەر زوڵاڵتر بڵێین، قوباد تاڵەبانی بەبێ سێ و دوو، خۆی گەیاندە شوێنی کارەساتبارو شانی دایە بەر بەرپرسیارەتییەکی مێژوویی و ئینسانی و ئەخلاقی وبەڵێنیدا، کە چەمچەماڵییەکان بەجێ ناهێڵێت و چاوپۆشی لە هیچ کەمتەرخەمییەک ناکات و هەموو تواناکان دەخەنەگەڕ بۆ قەرەبوکردنەوەی زیانلێکەوتووانی لافاوەکە، بۆ ئەو مەبەستە  پلانێکی سەردەمیانەیان داڕشت و لەو بوارەدا بریاری پێویست و یەکلاکەرەوەیدا .

هەرچەندە کارەساتێکی گەورەو  کاریگەر بوو، هەروەک سەرەڕای ئەوەی ئیرادەیەکی دژبەریش خۆی نمایشکردو  هەوڵی ئەوەی دەدا پرۆسەکە لە رێچکەو رێڕەوی خۆی لابدات، بەڵام هەڤاڵ قوباد تاڵەبانی و تیمەکەی و ئەو لیژنانەی کەپێکهێنرابوون توانیان لەو تاقیکردنەوەیەدا سەربکەون و لەماوەیەکی کەمدا پلان و بەڵێنەکان  خرایە بواری جێبەجێکردنەوە.

هەنگاوە کردەییەکانی قەرەبووکردنەوەی ماددی و مەعنەوی زیانلێکەوتووانی کارەساتەکە بە پشتیوانی دڵسۆزانی گەلەکەمان بەخێرایی  چوونەتە پێشەوە و ئیرادەی چارەسەر زاڵبوو بەسەر ئەو دۆخە ناخ هەژێنەدا و خەریکە ژیانی ئاسایی بەتەواوەتی بۆ قەزاکەو  و دەوروبەری دەگەرێتەوە.

ئەوەی زیاتر بووەتە جێگای خۆشحاڵی  هەموو خەڵکی کوردستان و سەرنجی میدیای بۆلای خۆی راکێشاوە، کاک قوباد مودێلێکی نوێی سەردەمیانەی لەهەرێمی کوردستان خوڵقاند، کە گرنگە  ئەم مودێلە هەموو ناوچەکانی هەرێمی کوردستان بگرێتەوە و مەبدەئی پاداشت و سزا و شەفافییەت بکرێتە بناغە و پێوەری سەرەکی بۆ چارەسەرکردنی کێشەکان و هەموو کەسێکی بەرپرسیاریش هەست بەو بەرپرسیارییەتییە بکات  و بچێتە ژێرباری پەسەندکردنی دەرەنجامەکانی ئەو بەرپرسیارییەتییە ، جا دەرەنجامەکان ئەرێنی بن یان نەرێنی.

دڵنیاین ئەم مودێلە نوێیە، دەبێتە مایەی خۆشحاڵی جەماوەری پایتەختی شەهیدان و ئەنفالکراوەکان، هەڤاڵەکانی کاک قوباد - یش بەچاوێکی رێزەوە ئەم ئەرکە سەرکەوتووانەی جێگری سەرۆکی حکومەتی هەرێم هەڵدەسەنگێنن و پێی دەڵێن چەمچەماڵییەکانت بەجێ نەهێشت، دڵنیابە ئێمەش بەتەنها لە گوڕەپانەکە بەجێتناهێڵین . 

PUKMEDIA