دواين ئاماری زیانى شەپۆلى باران و لافاوەکە بڵاوکرایەوە

بەڕێوەبەرێتی رۆشنبیری و هونەری چەمچەماڵ

لافاوەکەی قەزای چەمچەماڵ

ناوەندى هاوبەشیى هەماهەنگیى قەیرانەکان دوایین ئامارى زیانى شەپۆلى باران و لافاوەکەى هەفتەی رابردووی هەرێمی کوردستان و کەرکوکی بڵاوکردەوە و بەپێی ئامارەکە پێنج کەس گیانیان لەدەستداوە و زیاتر لە دوو هەزار ماڵیش زیانیان بەرکەوتووە.

بەپێی ئاماری ناوەندەکە، بەهۆی لافاوەکەی هەفتەی رابردووەوە، پێنج کەس گیانیان لە دەستداوە و دوانیان لە چەمچەماڵ، دوانیان لە کەرکووک و یەکێکیشیان لە گەرمیان بووە، 19 کەسیش برینداربوون، کەسێکیش بێسەروشوێنە، کە ئەندازیارە و بەڕەچەڵەک عەرەبە و لەرۆژی لافاوەکەوە لە سنووری بازیان بێسەروشوێنە.

 پەیوەست بە زیانە مادییەکانیش، ناوەندی هاوبەشیی و هەماهەنگی ئاشکرای کردووە: لە هەرێمى کوردستان و کەرکووک دوو هەزار و 376 ماڵ زیانیان بەرکەوتووە، (600) ماڵ لە چەمچەماڵ و (600) ماڵ لە شۆڕش و (400) ماڵ لە تەکیەك 435 ماڵیش لە کەرکووک و 167یش لە گەرمیان، لە هەولێر 20 ماڵ و لە هەڵەبجەش شەش ماڵ زیانیان بەرکەوتووە و لە سۆران چوار و لە ڕاپەڕینیش پێنج ماڵ.

هاوکات، 546 ئۆتۆمبێل زیانیان بەرکەوتووە، زۆرینەى لە سنوورى چەمچەماڵ بوون،هەروەها 132 دوکان و مارکێت، 118 باخ و کێڵگەى کشتوکاڵى لافاو زیانى پێگەیاندوون، بە هەمانشێوە 580 پرۆژە زیانیان بەرکەوتووە، زۆرینەیان لە پارێزگاى سلێمانى بە دیاریکراویش چەمچەماڵ بووە و 20پرۆژەش لە هەولێر بووە.

لە بارەی ئەو زیانانەی بەر سامانی ئاژەڵ کەوتوون، ناوەندى هەماهەنگیى قەیرانەکان ئاشکرای کردووە: زیاتر لە 379 هەزار ماسى و 13 هەزار و 256 مریشک و قەل، هەشت مانگا و 144 سەر مەڕ و بزن، لەگەڵ شەش هەنگ و 67 کۆتر و 76 قاز لەناوچوون.

PUKMEDIA