كۆماندۆی كوردستان: شەهید ئاكام ناوێكی درەوشاوەی مێژووی خەباتی كوردو پێشمەرگەیە

PUKMEDIA

شەهیدی فەرماندە ئاكام عومەر

فەرماندەیی هێزەكانی كۆماندۆی كوردستان، بۆ سێهەمین ساڵیادی شەهیدبوونی فەرماندە ئاكام عومەر، پەیامێكی بڵاوكردەوەو رایگەیاند: نەبەردییەكانی ئەو جوامێرە بۆ هەمیشە لە یادەوەرییەكانی كۆمەڵانی خەڵكی كوردستاندا بە زیندوویی دەمێنێتەوە و بەردەوام ئیلهام لە رێگە و رێبازەكەی وەردەگرین.

دەقی پەیامەكە:

سبەی سێ ساڵ بەسەر ژیانئاوایی شەهیدی فەرماندە "ئاكام عومەر" تێپەڕ دەبێت...

فەرماندە و برا و هاوڕێ و هاوسەنگەرمان بووە ناوێكی دیار و درەوشاوەی مێژووی خەباتی گەلی كورد و پێشمەرگە و "كۆماندۆی كوردستان"، كە بە تەمەنێكی كەمەوە مێژوویەكی پڕ لە شانازی تۆماركرد، بۆیە نەبەردییەكانی ئەو جوامێرە بۆ هەمیشە لە یادەوەرییەكانی كۆمەڵانی خەڵكی كوردستاندا بە زیندوویی دەمێنێتەوە.

لەم یادەدا بە رێز و شكۆوە لە حزووری رۆحی پیرۆزییدا دەست لەسەر دڵ، بیر و یادی دەكەینەوە و بەردەوام ئیلهام لە رێگە و رێبازەكەی وەردەگرین، كە خۆشەویستی بۆ خاك و نیشتمان لە ترۆپكی ئاواتەكانی بوو، بۆیە هەر بەو خۆشەویستییەوە خوێنی كردە خەڵات و بەڵێنەكەی، كە بە خودا و خاك و گەلی كوردی دا جێ بەجێ‌ كرد. 

شەهید " ئاكام عومەر" فەرماندەیەكی گەنجی جوامێری خواناسی پیاوخاس بوو، ڕێبازێكی بۆ براكانی لە"كۆماندۆی كوردستان"جێ هێشت، كە ئێستاش ڕێگە ڕۆشن و كاروانەكەی بەردەوامە، لە ژیانیدا بەردەوام هانی هەمووانی دەدا خاك ویست و خۆنەویست بین، دڵسۆز و وەفاداربین بۆ گەل و نیشتمان، هەمیشە لە بەرەی خەڵك بین و دژی نەیار و دوژمنانی كورد و گەلەكەی بین.

پێی  ئەوتین: ئاكار و رەفتار و گوفتارمان بۆ خەڵك و بەدڵی خەڵك بێت، بەردەوام لەناو خەڵكدا بین، بەشێك بین لەوان و بۆ خاك و نیشتمان بژین و بمرین، هەڵەو پەڵەی خۆمان ببینین پێش ئەوەی چاومان لەهەڵەی ئەوانی دیكە بێت.

ئەوەی "كوڕانی كۆماندۆ" لە هەر بوارێكدا بۆ خزمەتكردنی خەڵك دەیكات، ئەركە نەك منەت ئاوا گۆشكراو و جۆشدراوین، بۆیە لە خزمەتكردن ناوەستین و ناپسێین، بەهاناوە چوونمان لە ڕووداوەكان و كارەساتەكان دەكەینە بچوكترین خزمەت، كە پێشكەشی خەڵكی خۆمانی بكەین، بەدەر لەو ئەركەی لەسەر شانمانە .

یادی شەهیدان بەخێر و یاد و یادەوەرییەكانیان هەمیشە زیندوو...

راگەیاندنی فەرماندەیی هێزەكانی كۆماندۆی كوردستان

PUKMEDIA