مەکتەبی سیاسی: بە کاری پێکەوەیی و بەزوویی کۆنترۆڵی زیانەکانی لافاوەکە بکرێن

PUKMEDIA

لۆگۆی یەکێتيی نیشتمانیی كوردستان

ئەمڕۆ 9ی 12ی2025، باران و لافاو بەشێکی زۆری ناوچەکانی هەرێمی گرتەوە و زیانی گیانی و مادی لێکەوتەوە، مەکتەبی سیاسی یەکێتیی نیشتمانیی کوردستانیش داوا دەکات بە کاریپێکەوەیی و  هەماهەنگی و تەگبیری هاوبەشی  حکومەتی هەرێم ، پارێزگا و ئیدارە سەربەخۆکان و  دەزگا ڕەسمییەکانی  حکومەتی  فیدڕاڵی لە دابیکردنی ئامێر و کەرەستەکانی  پێویستن  بگاتە حاڵەتی ئامادەباشی تەواو و بە زوویی کۆنترۆڵی زیانەکان  بکرێن.

 مەکتەبی سیاسی یەکێتیی نیشتمانیی کوردستان لە راگەیەندراوەکەیدا ئاماژەی بەوەکردووە: بەداخەوە کە ئەمرۆ لەم شەپۆڵی بارانبارین و لافاوەی شارەکانی کوردستانی گرتۆتەوە  زیانێکی زۆر بەر ماڵ و حاڵی هاووڵاتیان و چەندین شوێنی گشتی  کەوتووە ، بەتایبەتی لە شاری چەمچەماڵ لە هەرێم و سنوری لەیلان لە کەرکوک  گەیشتە  گیان لە دەستدان و خنکان. 

 مەکتەبی سیاسی ئاماژەی بەوەشکردووە: وێڕای  ئاڕاستەکردنی  ماتەم و پەژارەی  خۆمان  بۆ  کەسوکاری  کۆستکەوتوان ، دەستخۆشی لە تیمەکانی فریاگوزاری و دەزگا پەیوەندیدارەکان دەکەین کە هیممەت بۆ چارەسەری لێکەوتەکانی  لافاوەکە دەکەن، بە پەرۆشەوە داواکارین هەماهەنگی و تەگبیری هاوبەشی   حکومەتی هەرێم ، پارێزگا و ئیدارە سەربەخۆکان و  دەزگا ڕەسمییەکانی  حکومەتی  فیدڕاڵی لە دابینکردنی ئامێر و کەرەستەکانی  پێویستن  بگاتە حاڵەتی ئامادەباشی تەواو و بە زوویی کۆنترۆڵی  زیانەکان  بکرێن، بەتایبەتی کە ئەم شەپۆڵە ماوەیەک بەردەوام دەبێت و پێویستی  بە کۆششی دەستەجەمعی و فریاگوزاری دەستبەجێ هەیە.

لە کۆتایشدا مەکتەبی سیاسی یەکێتیی نیشتمانیی کوردستان رایگەیاندووە:نزا دەکەین هاوڵاتیانی هەرێمی کوردستان و پارێزگای کەرکوک و تێکرای وڵاتەکەمان پارێزراو و سەلامەت بن

PUKMEDIA