قوباد تاڵه‌بانی: یه‌كێتی كاندیدی بۆ پۆستی سه‌رۆككۆمار ده‌بێت

PUKMEDIA

قوباد تاڵه‌بانی جێگری سه‌رۆك وه‌زیرانی هه‌رێمی كوردستان

قوباد تاڵه‌بانی رایده‌گه‌یه‌نێت: موچه‌ی مانگه‌كانی (تشرینی دوه‌م/11 و كانونی یه‌كه‌م/12)ی ئه‌مساڵی موچه‌خۆران نافه‌وتێت، دەشڵێت: له‌ئێستادا كاندیدمان بۆ پۆستی سەرۆککۆمار نییە، به‌ڵام ده‌مانبێت".

قوباد تاڵه‌بانی جێگری سه‌رۆك وه‌زیرانی هه‌رێمی كوردستان له‌میانی به‌شداریكردنی له‌ دیداری وه‌به‌رهێنانی سلێمانی و دامه‌زراوه‌ی IFC، له‌ لێدوانێكدا بۆ ده‌زگاكانی راگه‌یاندن رایگه‌یاند:كۆبونه‌وه‌كانمان له‌ به‌غداد دۆستانه‌بوون و ده‌رفه‌تێك بوون بۆئه‌وه‌ی تێبگه‌ین له‌سه‌ر ئه‌و تێڕوانینانەی له‌ به‌غداد هه‌ن، ده‌رفه‌تێكیش بوون بۆ یه‌كێتی تا بۆچوونی خۆمان پێشكه‌ش به‌ لایه‌نه‌ سیاسییه‌كانی عیراق بكه‌ین، هاوکات بڕ‌وامان به‌ عیراقێكی به‌هێز هه‌یه‌، عیراقێكی به‌هێزیش ده‌بێته‌ هۆی كوردستانێکی به‌هێز، وه‌ك یه‌كێتیش په‌یامی خۆمانمان گه‌یاند، كه‌ به‌شێك ده‌بین له‌ دارشتنی سیاسه‌تێكی ستراتیژی له‌سه‌ر په‌یڕ‌ه‌وێكی راست و دروست و چاره‌سه‌ركردنی كێشه‌كانی هه‌رێم و به‌غداد.

راشیگەیاند:كۆبوونه‌وه‌كانمان به‌رده‌وامن و هه‌فته‌ی داهاتوش كۆده‌بینه‌وه‌ و ده‌ستده‌كه‌ینه‌وه‌ به‌پرۆسه‌ی گفتوگۆكانمان كه‌ پێش هه‌ڵبژاردن هه‌نگاوی زۆر باش نرا".

قوباد تاڵه‌بانی ئاشكرایكرد، سه‌باره‌ت به‌ چاره‌نوسی موچه‌ی مانگه‌كانی 11 و 12 هه‌وڵده‌ده‌ین ئه‌و مافە نه‌فه‌وتێت و دڵنیام نافه‌وتێت، ئه‌م پرۆسه‌یه‌ به‌رده‌وامه‌، ئێمه‌ش كارده‌كه‌ین بۆ ئەوەی پرۆسه‌ی ناردنی موچه‌ نه‌وه‌ستێت و رادەستکردنی لیستی موچه‌ی هەموو مانگێک و هه‌نارده‌کردنی نه‌وتیش به‌رده‌وام ده‌بێت، بۆیه‌ به‌گشتی گه‌شبینم هه‌نگاوه‌كان زۆر باش ده‌ڕ‌ۆن".

سه‌باره‌ت به‌ كاندیدی یه‌كێتی بۆ پۆستی سه‌رۆك كۆمار، ئاماژەی بەوەکرد، ئێمه‌ وه‌ك یه‌كێتی تائێستا كاندیدمان بۆ پۆستی سه‌رۆك كۆمار نییه‌، به‌ڵام كاندیدمان ده‌بێت".


ئه‌مڕ‌ۆ سێشه‌ممه‌ دیداری وه‌به‌رهێنانی سلێمانی و دامه‌زراوه‌ی IFC به‌به‌شداریی دامه‌زراوه‌كانی حكومه‌تی خۆجێی سلێمانی و وه‌به‌رهێن و سه‌رمایه‌گوزاره‌كان به‌ڕ‌ێوه‌چوو، كه‌ له‌لایه‌ن به‌ڕ‌ێوه‌به‌رێتی گشتی وه‌به‌رهێنانی پارێزگای سلێمانی و دامه‌زراوه‌ی IFCی سه‌ر به‌ بانكی نێوده‌وڵه‌تی رێكخرابوو.

PUKMEDIA