عومەر جەبار: زیاتر ئاگاتان لەخاوەن پێداویستی تایبەت بێت

تایبەت

عومەر جەبار سەرۆكی ئەنجومەنی باڵای ڕێكخراوە خاوەن پێداویستییە تایبەتەكان

سەرۆكی ئەنجومەنی باڵای رێكخراوە خاوەن پێداویستییە تایبەتەكان رایدەگەیەنێت: لەم رۆژەدا، روو دەكەمە خاوەن ویژدانەكانی هەرێم و دەڵێم زیاتر ئاگاتان لە خاوەن پێداویستی تایبەت بێت.

عومەر جەبار سەرۆكی ئەنجومەنی باڵای ڕێكخراوە خاوەن پێداویستییە تایبەتەكان رایگەیاند: ئەمڕۆ 3ی12 رۆژی جیهانی خاوەن پێداویستی تایبەتە، هەربۆیە لەم رۆژەدا دەڵێین خاوەن پێداویستی تایبەت شیاوی خزمەتكردن و دەستگیرۆیی زیاترن، تا بەجۆرێك بژین كە شیاوی مێژووی مرۆڤایەتی بێت، ئەوەش بەوەدەكرێت كە حكومەت و لایەنە پەیوەندیدارەكان چاوی زیاتریان لە خاوەن پێداویستییە تایبەتەكان بێت و لەڕێگەی پڕۆژە یاسای تایبەتەوە ژیانێكی جێگیر و بەردەوامیان بۆ دابینبكەن".

راشیگەیاند: نامانەوێت بەچاوی بەزەییەوە سەیرمان بكەن و ئێمەش تاكێكی گرنگی كۆمەڵگەین و ژیانی ئێمەش وەك هەر تاكێكی تری كۆمەڵگەیە، تەنیا جیاوازی ئەوەیە ژیانكردن بۆ ئێمە سەختترە، داواکارم چیتر بەچاوی بەزەییەوە سەیرمان نەكەن و تواناكانمان ببینن.

عومەر جەبار ئاماژەی بەوەشکرد، بەدەرفەتی دەزانم لەڕۆژی جیهانی خاوەن پێداویستی تایبەت دا، سەر زەنشتی ئەوكارەی گوندی لاجان بكەم، كە بینیمان خاوەن پێداویستییەكی تایبەت بەم سەرمایە لە سەر ماڵ و حاڵی خۆی دەربەدەركرابوو، بۆ ئێمە چەندین جار بارتەقای سەختییەكانی ژیانمان ئەو وێنەیە ئازاری داین.

لە كۆتایدا سەرۆكی ئەنجومەنی باڵای ڕێكخراوە خاوەن پێداویستییە تایبەتەكان هیواشی خواست، لە ساڵی ئایندەدا كە ئەم یادە دەکەینەوە،  خاوەن پێداویستی تایبەت لەهەرێمی كوردستان هەر هیچ نەبێت بەشێك لە خواستەكانی دابین كرابێت و ئاهێك بگێڕینەوە بۆ ژیانی دژواری خاوەن پێداویستی تایبەت.

PUKMEDIA