هێزەكانی لاجان پابەندی بڕیارەكەی سەرۆكی لیژنەی ئەمنی هەولێر نابن

PUKMEDIA

هێزەكەی لاجان

هەرچەندە دانیشتووانی گوندی لاجان گەڕ‌اونەتەوە بۆ ماڵەكانی خۆیان، بەڵام هەتا ئامادەكردنی ئەم هەواڵە، هێزە ئەمنییەكانی هەولێر پابەندی بڕ‌یاری سەرۆكی لیژنەی ئەمنی هەولێر نەبوون و لەگوندی لاجان نەكشاونەتەوە.

هەرچەندە شەوی رابردوو، ئەمێد خۆشناو پارێزگاری هەولێر، كە هاوكات سەرۆكی لیژنەی ئەمنی پارێزگاكەشە، لەكۆنگرەیەكی رۆژنامەوانیدا بەڵێنی بەدانیشتووانی گوندی لاجان-دا كە سبەینێ، واتا ئەمڕۆ هێزە ئەمنییەكان لەگوندەكە دەكشێنەوە، بەڵام تاوەكو ئێستا هێزە ئەمنییەكان لە لاجان نەكشاونەتەوە، بۆیە پێدەچێت ئەو هێزەی لە لاجانە پابەندی فەرمانی سەرۆكی لیژنەی ئەمنی پارێزگای هەولێر نەبن و فەرمان لەحكومەتەوە وەرنەگرن، بەڵكو چاوەڕ‌وانی فەرمانی حزبی بن بۆ كشانەوە.

دوێنێ 1 ی 12 ی 2025، دانیشتووانی گوندی لاجان لەلایەن هێزەكانی پارتییەوە راگوێزران و  ژن و منداڵ و پیاوی گوندەكە دەربەدەر كران و ماڵ و حاڵی خۆیان جێهێشت و شەوی رابردوو بەسەدان دانیشتووی گوندەكە لەسەر شەقامەكان مانەوە، هەرچەندە ئەمڕ‌ۆ چوونەوە ماڵەكانی خۆیان، بەڵام تاوەكو ئێستا كوچە و كۆڵانەكانی گوندی لاجان بەهێزی ئەمنی حزبی تەنراون.

رۆژی 29ی 11ی 2025  لەگوندی لاجانی سەر بەپارێزگای هەولێر خۆپیشاندان ئەنجامدراو بەوهۆیەشەوە زیاتر لە 10 كەس برینداربوون و كەسێكش كوژرا.

خۆپیشاندانەكەی گوندی لاجان كەلەبەردەم كۆمپانیای لاناز لەلایەن خەڵكی ناوچەكەوە ئەنجامدراو هێزە ئەمنییەكانی هەولێر بەچەك رووبەڕ‌‌ویان بوونەوەو بەوهۆیەشەوە گەنجێك كوژراو زیاتر لە 10 كەسیش برینداربوون، هاوكات ژمارەیەك گەنجی هەركی لەلایەن لەشكری گوڵانی پارتییەوە دەستگیركران و تائێستا چارەنوسیان نادیارە، لەناو دەستگیركراوەكاندا چەند بریندارێك هەیە، بەڵام دینار نییە كە ئەو بریندارانە گیانیان لەدەستداوە یاخود لە نەخۆشخانە چارەسەر وەردەگرن.

PUKMEDIA