لەیەک مانگدا زیاتر لە22 هەزار منداڵ سەردانی نەخۆشخانەی منداڵانیان کردووە

PUKMEDIA

نەخۆشخانەی د.جەمال ئەحمەد رەشیدی منداڵانی فێركاری

بەڕێوەبەرایەتی گشتی تەندروستی سلێمانی رایدەگەیەنێت: لەمانگی رابردوودا 22 هەزار و 859 منداڵی نەخۆش لە هەردوو بەشی دەوامی بەیانیان و بەشی راوێژكاری نەخۆشخانەكە بینراون و 2 هەزار و905 منداڵیش داخڵی نەخۆشخانەکە كراون.

بەپێی ئامارێکی بەڕێوەبەرایەتی گشتی تەندروستی سلێمانی لە ماوەی مانگی رابردوودا لە رۆژی (1ی11 بۆ 30ی11ی2025) لە نەخۆشخانەی د.جەمال ئەحمەد رەشیدی منداڵانی فێركاری 22 هەزار و 859 منداڵی نەخۆش لە هەردوو بەشی دەوامی بەیانیان و بەشی راوێژكاری نەخۆشخانەكە بینراون و سەرجەمیان چارەسەری پێویستییان بۆ كراوە، لەو ژمارەیەش 2 هەزار و905 منداڵیش داخڵی نەخۆشخانەکە كراون.

هەر بەپێی ئامارەکە، لە مانگی رابردوودا لە نەخۆشخانەی منداڵان 876 حاڵەتی سكچون و رشانەوە و ووشكبوونەوە و 827 حاڵەتی هەناسە توندیی تۆماركراون، هاوکات 304 منداڵ لە بەشی تیشك و دەمار و 106 منداڵ لە بەشی بەدخۆراكی و 132 منداڵ لە بەشی راهێنانەوەی چارەسەری خۆراك بینراون و 218 منداڵیش لە بەشی نەبەكام داخڵ كراون.

لە ئامارەکەدا بەڕێوەبەرایەتی گشتی تەندروستی سلێمانی ئاماژەی بەوەشکردووە، هەر لەو ماوەیەدا لە نەخۆشخانەی د.جەمال ئەحمەد رەشیدی منداڵانی فێركاری  19 هەزار و 830 پشكنینی تاقیگەیی جۆراوجۆر و 474 سۆنەر و 118 ئیكۆ و 32 نازور ئەنجام دراون، هاوکات 475 تیشك گیراوە.

PUKMEDIA