بەشی هەڵسەنگاندن و بەدواداچونی میدیای یەکێتیی: میدیا فوتێکراوەکان کەی واز لە گارە گار دێنن؟

PUKMEDIA

یەکێتیی نیشتمانیی کوردستان

 بەشی هەڵسەنگاندن و بەدواداچونی میدیای یەکێتیی  لە راگەیەندراوێکدا ئاماژەی بەوەکردووە:   ئەو میدیا سێبەرانەی پارتی کە گارەگار لەسەر هێرشەکەی کۆرمۆر دەکەن  ئەگەر زەڕەیەك كەرامەتی میدیاییان هەبێت دەبێت واز لەو ژەهرە بێنن و ناچارمان نەکەن بە هەندێک پەیامی دیکە گارەگارتان خامۆش بکەین .

دەقی راگەیەندراوەکەی بەشی هەڵسەنگاندن و بەدواداچونی میدیای یەکێتیی

ئەو میدیا فوتێكراوانە كەی واز لە گارەگار دێنن

چەند رۆژێكە گارەگاری درۆزنانەی چەند سەرچاوەیەکی میدیای رەسمی و سێبەری پارتی بۆ  غازی کۆرمۆر لە گارەگاری درۆزنانەی مریشکێکی بێ بەرهەم دەچێت، هەر هەرا هەرایەتی و هێلكەیەك ناخاتە ناو سەبەتەی راستی و بەرپرسیاریەتیەوە.

ئەوجۆرە روماڵە نا مۆڕاڵیە روبەڕووی ناڕەزایی و سەركۆنەكردنی ناوخۆیی بوەتەوە و ئەگەر زەڕەیەك ئەقڵ میوانیان بێت ئەو هەموو پەیامەیان پێگەیشت، كە پێیان وترا: هەزار هاتوو هاوار بکەن و بەناوی كۆرمۆرەوە فرمێسکی تیمساحی بڕێژن، هیچ کەسێک بڕوا بە چەواشەکاری و ژەهر رشتن و رق و کینەی ئێوە ناکات و هەموو کەسێک دەزانێت کوێتان دێشێت و ناختان چی تێدایە.

ئاخر بە دەردی دەڵێن: هەی حوشترینە چ کەسێک هەیە ماڵی خۆی بسوتێنێت، چ کەسێک هەیە ماڵی خۆی بەدەستی خۆی تاریک بکات، چ کەسێک هەیە شادەماری ئابووری وڵات ببرێت، کە هەر لەسەر ئەو غاز و شادەمارە چەندین ساڵە لەگەڵ ئێوە و  هاوبیرانی ئێوە لە شەڕێکی  سەختی سیاسیدایە. جارێكی تریش ناچارمان دەكەن پێتان بڵێین: هەی حوشترینە ئێمە خەریکی بەدواداچونین بۆ دۆزینەوەی بکەرانی ئەو پەلامارە تیرۆریستیە و ئێوەش خەریکی چەواشەکارین .

 دەزانین ئێوە چەندە دڵخۆشن بەو پەلامارە تیرۆرستییە، چونکە هەوڵێکی زۆرتاندا غازەکەش بەدەردی نەوتەکە ببەن، نەمانهێشت ، رێگریمانکرد ، هەڵوێستی تۆندمان نواند . کوڵمان نەدا تاپرۆژەکە گەیشتە ئەنجام و بەبێ جیاوازی خزمەت بەهەموو خەڵکی کوردستان دەگەیێنێت . بۆیە چاوتان بەو پرۆژە ستراتیژییە هەڵنایەت و وا ئەمڕۆكە بە روکەش فرمێسکی تیمساحی بۆ دەڕێژن و ئەگەرنا لە خۆشیاندا هەڵدەپەرن، ئامۆژگاری داتان نادات، بەڵام ئەگەر زەڕەیەك كەرامەتی میدیایتان هەبێت دەبێت واز لەو ژەهرە بێنن و ناچارمان مەکەن بە هەندێک پەیامی دیکە گارەگارتان خامۆش بکەین .

 بەشی هەڵسەنگاندن و بەدواداچونی میدیای یەکێتیی نیشتمانیی کوردستان