نێروەیی: بەدەستپێشخەری یەكێتی دەتوانرا كورد ئەنجومەنێكی سیاسی بەهێزی لەبەغداد هەبێت

PUKMEDIA

لەتیف نێروەیی، ئەندامی سەركردایەتی و لێپرسراوی بۆردی راگەیاندنی یەكێتی

لێپرسراوی بۆردی راگەیاندنی یەكێتیی نیشتمانیی كوردستان رایدەگەیەنیت: یەكێتی، سێ ساڵ لەمەوبەر دەستپێشخەری كردو پڕ‌ۆژەی پێكهێنانی ئەنجومەنێكی سیاسی خستەبەردەم لایەنە سیاسییەكانی هەرێمی كوردستان، چونكە پێیوابوو، پێكهێنانی ئەنجومەنێكی وەها دەبێتە هۆی بەهێزبوونی پێگەی كورد لە بەغداد و هەوێنی تەبایی و یەكڕ‌یزی لەهەرێمی كوردستان، بەڵام بەهۆی بەشدارینەكردنی سەرجەم لایەنە سەرەكییەكانەوە پڕ‌ۆژەكە نەكەوتە بواری جێبەجێكردنەوە.

لەتیف نێروەیی، ئەندامی سەركردایەتی و لێپرسراوی بۆردی راگەیاندنی یەكێتیی نیشتمانیی كوردستان، تایبەت بە PUKMEDIA ی رایگەیاند: پاش كۆتایی هاتنی هەڵبژاردنی ئەنجومەنی نوێنەرانی عیراق، پێكهاتەی سوننە و شیعە لەناو خۆیاندا هاوپەیمانێتیان پێكهێنا، هاوكات پێكهاتەی سوننە ئەنجومەنێكی سیاسی پێكهێنا، ئەمەش بووە پرسێكی سەرەكی ناو نوخبەی سیاسی و رۆشنبیران و میدیای كوردی و ئەو پرسیارەیان وروژاند كە بۆ لەكوردستاندا ئەم جۆرە ئەنجومەنانە پێكناهێندرێن؟.

راشیگەیاند: سێ ساڵ لەمەوبەر و بە دیاریكراوی لەرۆژی 24ی 11ی 2022 دا، بافڵ جەلال تاڵەبانی سەرۆكی یەكێتیی نیشتمانیی كوردستان، لە پەیامێكدا داوای لەسەرجەم هێز و لایەنە كوردستانییەكان كرد كۆببنەوە، كۆبوونەوەكەش لەهاوینەهەواری دوكان ئەنجامدراو 22 لایەنی سیاسی بەشداریان تێدا كردو پڕ‌ۆژەی یەكێتی كە بیرۆكەی پێكهێنانی ئەنجومەنیكی سیاسی تێدابوو خرایە بەردەمیان، هەرچەندە هاوهەڵوێست و هاوڕ‌ای یەكێتی و سەرۆك بافڵ بوون، بەڵام بەداخەوە هەموو لایەنە سەرەكییەكان بەشداریان نەكردو پڕ‌ۆژەكە نەكەوتە بواری جێبەجێكردنەوە.

لەتیف نێروەیی ئاماژەی بەوەشكرد:پێكهێنانی ئەنجومەنێكی سیاسی دەبێتە هۆی بەهێزبوونی پێگەی كورد لەبەغداد و هەوێنی تەبایی و یەكڕ‌یزی لەهەرێمی كوردستان، هاوكات زەمینە خۆشكەر دەبێت بۆ چارەسەركردنی هەر مەترسی و ئاڵۆزییەك كە دێنە پێشەوە، چونكە دەتواندرێت لەو رێگایەوە بە كۆدەنگی گفتوگۆی لەبارەوە بكەن و چارەسەری بۆ بدۆزنەوە، هەربۆیە یەكێتی سێ ساڵ لەمەوبەر ئەو دەستپێشخەرییەی كردووە و ئەوە هەڵوێستی رەسمی یەكێتی بووە بۆ پێكهێنانی ئەنجومەنێكی سیاسی.

PUKMEDIA