قوباد تاڵەبانی: حکومەتێکی سەرکەوتوو بەبێ یەکێتی پێکنایەت

PUKMEDIA

قوباد تاڵەبانی

قوباد تاڵەبانی لە وەڵامی  رۆژنامەنوساندا رایگەیاند: وەک یەکێتی بۆ پێکهێنانی حکومەت گفتوگۆمان لەگەڵ پارتی کردوەو بەردەوامیش دەبین، پۆستی سەرۆککۆمار ئیستحقاقی کوردە، دەبێت کابینەی داهاتووی عیراق بەشێوەیەکی ریشەیی پرسی نەوت و مووچە یەکلایی بکاتەوە، دڵنیاین حکومەتێکی سەرکەوتوو بەبێ بەشداریکردنی یەکێتی پێکنایەت.

 پۆستی سەرۆککۆمار ئیستحقاقی کوردە

قوباد تاڵەبانی جێگری سەرۆکی ئەنجومەنی وەزیرانی هەرێم لە کۆنگرەیەکی رۆژنامەوانیدا رایگەیاند: ئێمە وەک یەکێتیی نیشتمانیی کوردستان لەگەڵ برایانی پارتی لە گفتوگۆدا بوین تا کاتی گەرمەی بانگەشەی هەڵبژاردن و ئێستاش ئامادەین دەستپێبکەینەوە بۆ پێکهێنانی کابینەی نوێی حکومەتی هەرێم، هاوکات بۆ پێکهێنانی حکومەتی نوێی عیراق پێویستمان بە گفتوگۆیە و پێویستە هەموو لایەنەکانیش بەشدار بن هەتا بتوانێت خزمەتکارێکی باشی خەڵک بێت بە گشتی، ئەوەش روونە کە لایەنە کوردستانییەکان لە عیراق پۆستی سەرۆککۆمار بە ئیستحقاقی کورد دەزانن.

بەشێوەیەکی ریشەیی پرسی نەوت و مووچە یەکلایی بکرێتەوە

وتیشی: عیراق توانایەکی ئابوری و مرۆیی زۆر گەورەی هەیە و دەتوانێت پێگەیەکی گەورەی نێودەوڵەتی هەبێت، بەڵام تا ئێستا نەیتوانیوە بە ئاستی شایستەی خۆی بگات، بەهیواین بەڕێککەوتنی نێوان لایەنەکان پێیبگەن و دەبێت کابینەی داهاتووی عیراق بەشێوەیەکی ریشەیی پرسی نەوت و مووچە یەکلایی بکاتەوە، یاسای نەوت و گاز لە ئەرکە لەپێشینەکانی بێت، ئێمەش وەک یەکێتی لە پەرلەمانی عیراق بۆ ئەوە کاردەکەین.

هاوکات لەبارەی خزمەتگوزارییەکان لە سلێمانی ئاماژەی بەوەکرد: لەماوەی رابردوو خزمەتگوزاری لە سلێمانی نەوەستاون و ناشوەستن و بەردەوام وەبەرهێنەران دێنە ئەم شارە و پەرە بە کار و پرۆژەکانیان دەدەن، ئەوەش دەگەڕێتەوە بۆ ئەم کەشە ئەمنییە پارێزراوەی لە سلێمانی هەیە.

حکومەتێکی سەرکەوتوو بەبێ یەکێتی پێکنایەت

لەبارەی حکومەتی هەرێمیشەوە وتی: ئێمە باسی حکومەتی بنکەفراوانمان نەکردووە، لەوەش دڵنیاین حکومەتێکی سەرکەوتوو بەبێ بەشداریکردنی یەکێتیی نیشتمانیی کوردستان پێکنایەت.

لەوەڵامی پرسیاری رۆژنامەنوسانیشدا لەبارەی پارێزگاری کەرکوکەوە وتی: رێبوار تەها پارێزگارێکی سەرکەوتوو بووە بۆ کەرکوک بەهەموو پێکهاتەکانیەوە بۆیە کەسانی سەرکەوتوو هەقی خۆیانە لە پۆستەکەیانا بمێننەوە.

PUKMEDIA