شێخ جەعفەر: بەشکۆوە یادی رۆژی شەهیدی یەکێتی دەکەینەوە

PUKMEDIA

شێخ جەعفەر شێخ مستەفا جێگری سەرۆکی هەرێمی کوردستان

جێگری سەرۆکی هەرێم  لە یادی رۆژی شەهیدی یەکێتیدا پەیامێک بڵاودەکاتەو و دەڵێت: بە شکۆوە یادی رۆژی شەهیدانی یەکێتی دەکەینەوە، لەم رۆژەدا دروود بۆ رۆحی پاکی شەهیدانی یەکێتی و گشت شەهیدانی رێگای رزگاریخوازی کوردستان.

دەقی پەیامەکە..

لە 21ی تشرینی دووەمی هەموو ساڵێکدا بە شکۆوە یادی رۆژی شەهیدانی یەکێتی دەکەینەوە، لەم رۆژەدا دروود بۆ رۆحی پاکی شەهیدانی یەکێتی و گشت شەهیدانی رێگای رزگاریخوازی کوردستان دەنێرم، هەمیشە سەربەرز و سەرفراز بن کەسوکار و خانەوادەی شەهیدەکانمان.

یەکێتیی نیشتیمانیی کوردستان هەر لە سەرەتای دامەزراندنیەوە تاکو ئێستا، رووبارێک خوێنی لەپێناو گەیشتن بۆ ئازادی و رزگاریی کوردستان بەخشیوە، هەر لە شەڕە دەستەویەخەکانی شاخ و هێرشە پارتیزانەکانی ناو شار تا ژووری زیندانییەکانی بەعسی فاشیزم و سەنگەری بەرگری دژ بە تیرۆریستانی داعش خوێنی لە جەستەی چۆڕاوە.

ئەم یادە رۆژێکی مەزنە لە مێژووی پڕ سەروەریی و خەباتی شۆڕشگێڕی حزبی شەهیدان کە یەکێتیی نیشتیمانیی کوردستانە، هەروەها هاوکاتە لەگەڵ رۆژی لە سێدارەدانی سێ سەرکردەی قارەمانی یەکێتی بە ناوەکانی (شەهابی شێخ نووری و جەعفەر عەبدولواحید و ئەنوەر زۆراب)، مێژووی یەکێتی دەرخەری خەمخۆری و ئازایەتیی سەرکردەکان و پێشمەرگەکانیەتی، هێزی یەکێتیی نیشتیمانی لە بیروباوەڕەوە سەرچاوەی گرتووە، بۆیە ئەستەمە بۆ نەیارانی بیر لە لاوازبوونی بکەنەوە.

سڵاو لە كەسوكاری سەربەرزی شەهیدان بێت، کە ئازیزترینەکانی خۆیان پێشكەش بە كورد و كوردستان كردووە، دڵنیایان دەکەینەوە کەوا لای ئێمە هەمیشە جێگای شانازین.

شێخ جەعفەر شێخ مستەفا
جێگری سەرۆکی هەرێمی کوردستان

PUKMEDIA