قوباد تاڵەبانی: هەردوو حکومەتی داهاتووی عیراق و هەرێم کێشەکان چارەسەربکەن

راگەیاندنی جێگری سەرۆکی حکومەت

قوباد تاڵەبانی و محەمەد حەسان، نوێنه‌رى تايبه‌تى سكرتێرى گشتیی نەتەوەیەكگرتووەكان

قوباد تاڵەبانی جێگری سەرۆکوەزیرانی هەرێمی کوردستان بە جیا لەگەڵ هەر یەکە لە عیرفان سدیق، باڵیۆزی بەریتانیا و نيكۆلۆ فۆنتانا، باڵيۆزى ئيتاڵيا و محەمەد حەسان، نوێنه‌رى تايبه‌تى سكرتێرى گشتیی نەتەوەیەكگرتووەكان لە عیراق کۆبووەوە.

لە هەر سێ کۆبوونەوەکەدا کە رۆژی سێ شەمە18ی11ی2025،  لە هەولێر بەڕێوەچوون، تاوتوێی دۆخی عیراق لە دوای بەڕێوەچوونی هەڵبژاردنەکانی ئەنجومەنی نوێنەرانی عیراق کرا، جێگری سەرۆکوەزیران بەڕێوەچوونی سەرکەوتووانەی هەڵبژاردنەکانی بە دەستکەوتێکی گەورە بۆ خەڵکی عیراق وەسف کرد و هیوای خواست بەپێی ئەنجامەکانی ئەم هەڵبژاردنە حکومەتێک پێکبهێنرێت کە لە ئاست داواکارییەکانی هاووڵاتییانی عیراقدا بێت و مافەکانی هەموو پێکهاتەکان تیایدا پارێزراوبێت.

قوباد تاڵەبانی جەختیشی کردەوە کە پێویستە ئەولەوییەتی هەر دوو حکومەتی داهاتووی عیراق و هەرێم چارەسەرکردنی بنەڕەتی کێشەکانی نێوان هەرێم و بەغداد بێت بەپێی دەستور و رایگەیاند چارەسەرکردنی کێشەکان دەرگا دەکاتەوە بەرەو عیراقێکی سەقامگیرتر و هەنگاونان بەرەو گەشەپێدانی ئابووری و باشترکردنی دۆخی خزمەتگوزارییەکان.

سەبارەت بە چۆنییەتی بەشداریکردنی لایەنە کوردستانییەکان لە حکومەتی داهاتووی عیراقدا، جێگری سەرۆکوەزیران بە پێویستی زانی لایەنە کوردستانییەکان لەڕێی گفتوگۆی بنیاتنەرانەوە لەسەر بەرنامە و پلانی هاوبەش رێکبکەون و بە یەکڕیزییەوە لەگەڵ لایەنە عیراقییەکان بکەونە دانووستانەوە بۆ ئەوەی باشتر بتوانن داکۆکی لە مافە دەستورییەکانی خەڵکی کوردستان بکەن.

PUKMEDIA