محه‌مه‌د دووشیوانی: لای پارتی هه‌ڵبژاردن له‌ئاكرێ كۆتایی هات

PUKMEDIA

محەمەد دووشیوانی لێپرسراوی بازنه‌ی بادینانی یه‌كێتی

لێپرسراوی بازنه‌ی بادینانی یه‌كێتی چه‌ند زانیارییه‌كی نه‌بیستراو بڵاوده‌كاته‌وه‌و ره‌تیشیده‌كاته‌وه‌ هیچ كادرێك له‌سنووری ئاكرێ په‌یوه‌ندی به‌ڕ‌ێزه‌كانی پارتییه‌وه‌ كردبێت، ده‌شڵێت: له‌به‌ڕ‌ێوه‌به‌رایه‌تی هاتووچۆی ئاكرێ سندوقی هه‌ڵبژاردن دانراوه‌و سه‌رجه‌م كارمه‌نده‌كانیان ده‌نگیان داوه‌.

محه‌مه‌د دووشیوانی لێپرسراوی بازنه‌ی بادینانی یه‌كێتی به‌وێبسایتی ره‌سمیی یه‌كێتیی نیشتمانیی كوردستان PUKMEDIA ی رایگه‌یاند: ماوه‌یه‌كه‌ به‌شێك له‌به‌رپرسانی پارتی له‌ قه‌زای ئاكرێ باس له‌وه‌ده‌كه‌ن كه‌ 300 ئه‌ندامی یه‌كێتی په‌یوه‌ندییان كردووه‌ به‌ ریزه‌كانی پارتییه‌وه‌، له‌ڕ‌استیدا ئه‌مه‌ زۆر دووره‌ له‌ڕ‌استییه‌وه‌، ته‌حه‌دا ده‌كه‌م یه‌ك ئه‌ندامی مه‌ڵبه‌ندی یه‌كێتی په‌یوه‌ندی به‌پارتییه‌وه‌ كردبێت له‌سنووری ئاكرێ، ئه‌گه‌ر هه‌یه‌ با ناوه‌كه‌ی و ناسنامه‌كه‌یمان پیشانبده‌ن.

راشیگه‌یاند: كاره‌ساته‌ ئه‌و حزبه‌ به‌ بڵاوكردنه‌وه‌ی ده‌نگۆی ناڕ‌است خۆڵ ده‌خاته‌ چاوی خه‌ڵك، هاوكات به‌پێی ئه‌و زانیارییانه‌ی له‌سه‌رچاوه‌یه‌كی زۆر تایبه‌ته‌وه‌ پێمگه‌یشتووه‌، هه‌ڵبژاردن له‌ لای پارتی كۆتایی هاتووه‌، به‌جۆرێك رۆژی پێنج شه‌ممه‌ له‌به‌ڕ‌ێوه‌به‌رایه‌تی هاتووچۆی ئاكرێ سندوقی هه‌ڵبژاردن دانراوه‌و سه‌رجه‌م كارمه‌نده‌كانیان بانگكردووه‌ته‌وه‌ كه‌ ده‌نگبده‌ن، هه‌ر بۆیه‌ ده‌ڵێم ئافه‌رین دیموكراسی ساخته‌.

PUKMEDIA