سەعدی پیرە: لەژێر ناوی بێ مانا مووچەی خەڵکی هەرێم بڕدرا

PUKMEDIA

سەعدی ئەحمەد پیرە، ئەندامی مەكتەبی سیاسی یەكێتیی نیشتمانیی كوردستان

سەعدی ئەحمەد پیرە، ئەندامی مەكتەبی سیاسی یەكێتی رایدەگەیەنێت، لەسەر چەند پرسێكی گرنگ لەگەڵ پارتی جیاوازیمان هەیە، بۆیە گرنگە حكومەتێكی بێ كەموكوڕی پێكبهێندرێت و لەژێر ناوی بێ ماناشدا مووچەی خەڵكی هەرێم بڕدرا.

سەعدی ئەحمەد پیرە، ئەندامی مەكتەبی سیاسی یەكێتیی نیشتمانیی كوردستان، سەبارەت بە پێكهێنانی كابینەی نوێی حكومەتی ھەرێمی كوردستان رایگەیاند: پێكهێنانی كابینەی نوێ گرنگە، چونكە دەبێت كێشەكانی رابردوو چارەسەربكات و ئێمە جیاوازیمان لەگەڵ لایەنەكانی دیكە و بەتایبەت لەگەڵ پارتیدا هەیە، ئەوان لەژێر ناوی بێمانا و كەرامەتدا مووچەی هەرێمیان بڕی، لە كاتێكدا هەمووان دەزانین كەرامەت گرنگە و چەندین ساڵە خەڵك لەپێناویدا شەڕدەكات، بەڵام ناكرێت تێر ئاگای لە برسی نەبێت.

راشیگەیاند: ناكرێت بەردەوام داوای پلەو پۆست لە عیراق بكەین و خۆشمان وا پیشانبدەین كە دژی عیراقین، ئێمە وەك یەكێتی دژی نین، بەڵكو عیراق بە قوڵایی ستراتیجی چارەسەركردنی كێشەكانی هەرێم دەزانین.

ئاماژەی بەوەشكرد: بە سوود وەرگرتنمان لەپێگەی خۆمان لەكۆمەڵگەی نێودەوڵەتی، پشتیوانی لەو گۆڕانكارییانە دەكەین كە لەباكوری كوردستان هاتوونەتە پێشەوە بۆ چارەسەركردنی كێشەكان، هاوكات سیاسەتی كوردستانیمان بۆ رۆژئاوا و لە ئایندەدا بۆ رۆژهەڵاتیش هەیە.

سەعدی ئەحمەد پیرە وتیشی: پارتی سنوورەكان دادەخات و ئازاری خەڵك دەدات، بۆیە دەبێت هەوڵبدەین حكومەتێكی بێ كەموكوڕی پێكبهێنین بۆ بەرژەوەندییەكانی گەلەكەمان.

PUKMEDIA