مەکتەبی سیاسی: یەکێتی ژنان لە خەبات و تێکۆشاندا رۆڵی بەرچاویان هەبووە

PUKMEDIA

لۆگۆی یەکێتیی نیشتمانیی کوردستان

مەکتەبی سیاسی یەکێتیی نیشتمانیی کوردستان لە یادی 36 ساڵەی دامەزراندنیدا پیرۆزبایی لە یەکێتیی ژنانی کوردستان دەکات و رایدەگەیەنێت: ئەو ڕۆڵەی کە ئەمڕۆ  کچان و ژنانی کورد هەیانە، بە شێکی  زۆری دەگەڕێتەوە بۆ  هەوڵە بەردەوامەکانی ئەم ڕێکخراوە تێکۆشەرە  کە ماندوونەناسانە و کۆڵنەدەرانە خزمەتی ژنانی کردووە.

دەقی پەیامەکەی مەکتەبی سیاسی:


بەڕێزان سکرتێر و ئەندامانی سکرتاریەتی یەکێتیی ژنانی کوردستان 

لەیادی 36 ساڵەی دامەزراندنی ڕێکخراوەکەتاندا گەرمترین پیرۆزباییتان ئاڕاستە دەکەین

 یەکێتیی ژنانی کوردستان لە ڕۆژگاری ناهەمواری پاش  جینۆسایدی ئەنفال و کیمیابارانی کوردستاندا، شانبەشانی خەباتی  سیاسی، بۆ ڕووبەڕوو بونەوەی  ئەو نەهامەتیانەی  ئەو ڕۆژانە، بۆ بەرگریی زیاتر  لە مافەکانی کچان و ژنانی کوردستان دامەزرا و لەوکات و سەردەمەی ئاوارەییدا، توانرا ژمارەیەکی  زۆر لە کچان و ژنان ڕێکبخات و لە دەوری خۆی کۆیان بکاتەوە.

هەر لە سەرەتای  ڕاپەڕینەوە یەکێتیی  ژنان توانی ژمارەیەکی بەرچاو لە کچ و ژنی بەتوانا پێبگەیەنێت، کە لەناو کایەی سیاسی و حکومیی و پارلەمانییدا ڕۆڵ و پێگەیان هەبێت.
ئەو ڕۆڵەی کە ئەمڕۆ کچان و ژنانی کورد لە گۆڕەپانی خەبات و تێکۆشاندا هەیانە، بە شێکی زۆری دەگەڕێتەوە بۆ هەوڵە بەردەوامەکانی ئەم ڕێکخراوە تێکۆشەرە کە ماندوونەناسانە و کۆڵنەدەرانە خزمەتی ژنان و پرسە گرنگەکانی ئەم توێژە گرنگە و کچانی گەنجی کوردستانیان کردووە.

یادی ئەمساڵ نزیکە لە هەڵبژاردنی  خولێکی  تری  پەرلەمانی  عیراق ، بۆیە بەشداریی گەرموگوڕی کچان وژنان   لەپرۆسەیەکی وەهادا و دەنگدان بە لیستی 222 یەکێتیی نیشتمانیی کوردستان بەتەنها ژمارەیەک  نابێت لە سندوقەکانی  دەنگداندا، بەڵکو ماناو پێگەیەکی فراوانتر دەبەخشێت بە کۆمەڵگە چونکە دەنگی ژن  نوێنەرایەتی  دیدگای  نیوەی کۆمەڵگا دەکات.

لەم یادەدا سڵاو دەنێرین بۆ گشت ژنانی تەوار ئاسا، کە بەردەوامن لە خەبات و داهێنان.
درود بۆ ڕۆحی ئەو  ژنانەی پێشەنگ بوون لە بەرەوپێشبردنی ژنان بۆ ناو کایەکانی تێکۆشان وهەموو تەمەنیان بەو خەباتە پیرۆزە بەخشی.

سەری  ڕێزو نەوازش بۆ ئەو دایکانە دادەنەوێنین، کە لەناو ناخۆشی و سەختییەکانی  ژیاندا وەک  ژن و دایکی  نمونەیی، نەوەیەکیان  بۆ  خزمەتی  گەل و وڵات پەروەردە کرد و بۆ ئەو تەوارانەی وەک بەشدارێکی کارای هێنانەدی  ماف و دیموکراسی، جێپەنجەیان لەسەر نەخشەی گۆڕانکارییەکان هەیە.

مەکتەبی  سیاسی
یەکێتیی نیشتمانیی کوردستان

PUKMEDIA