سەرۆککۆمار: عیراق ئامادەیە ببێتە خاڵی پەیوەندی رۆژهەڵات و رۆژئاوا

نوسینگەی رۆژنامەوانی سەرۆککۆماری عیراق

سەرۆککۆماری عیراق

د. عەبدوللەتیف جەمال ڕەشید، سەرۆک کۆماری عیراق وتارێکی لە کۆمەڵەی گشتیی نەتەوەیەکگرتووەکان پێشکەشکرد و رایگەیاند: شانازی دەکەم لە بەردەم ئێوەدا بوەستم، بەناوی عیراقەوە قسە بکەم، بەو مێژووە دوور و درێژەی کە ئێوە دەیزانن، هەروەها سوپاسی نەتەوەیەکگرتووەکان دەکەم بۆ ڕۆڵی پشتیوانی و بەرگریکردن لە سیستەمی دیموکراسی.

عیراق ئامادەیە ببێتە خاڵی پەیوەندی رۆژهەڵات و رۆژئاوا

ئاماژەی بەوەشکرد: عیراق پێگەی ئاسایی خۆی لە کۆمەڵگەی نێودەوڵەتی و پەیوەندییەکانی لەگەڵ دراوسێکانی وەرگرتەوە و ئامادەیە ببێتە خاڵی پەیوەندی نێوان ڕۆژهەڵات و رۆژئاوا، هەر لەوتارەکەیدا لە کۆمەڵەی نەتەوە یەکگرتووەکان سەرۆک کۆماری عیراق باسیلەوەشکرد: بە پشتیوانی دۆستەكانمان مەترسیدارترین هەڕەشەی تیرۆریستیمان تێکشکاند، هەروەها كار دەكەین بۆ سڕینەوەی شوێنەواری پەلامارە تیرۆریستییەكان، هاوکات بە ئیرادەیەكی نیشتمانی كار دەكەین بۆ دامەزراندنی داهاتوویەكی ئومێد بەخش.

جارێکی دیکە کەمینەکانی عیراق جینۆساید ناکرێن

د.لەتیف رەشید ئاشکراشیکرد، هەوڵەكانمان بۆ گەڕاندنەوەی ئاوارەكان پێویستی بە پشتیوانی نیودەوڵەتییە، گرنگیشە كەمینەكان لە عیراق دڵنیا بكرێنەوە كە جارێكیتر رووبەڕووی جینۆساید نابنەوە، ئەوەشی خستەڕوو، وەکو پارێزەرێک کاردەکەم بۆ هەڵبژاردنێکی پاک و بێگەردانە لە پڕۆسەی ئاشتیانە و گواستنەوەی دەسەڵات بەردەوام دەبین، هەروەها هەوڵەکانمان بۆ بەهێزکردنی ئابوری و هەمەچەشنکردنی بەمەبەستی كەمكردنەوەی پشتبەستن بە نەوت بەردەوامە و كاردەكەین بۆ چالاکردنی وەبەرهێنانی توانا گەورەکانمان، داواش لە وڵاتانی وەبەرهێنان دەکەین روو لە عیراق بکەن.

وشکەساڵی و بیابان بوون هەڕەشە لە عیراق دەکەن

سەبارەت بە گۆڕانی کەشوهەوا و وشکەساڵی سەرۆک کۆماری عیراق هۆشداریدا: کە عیراق یەکێکە لەو وڵاتانەی زۆرترین کاریگەری گۆڕانی کەشوهەوای لەسەرە، كەمئاویی و وشكەساڵی و بیابانبوون هەڕەشە لە بوونی عیراق دەكات، بۆیە پێویستە توركیا و ئیران لە پرسی ئاو ئاگاداری ئەوەبن كە زیان بە عیراق نەگەیەنن.

دامەزراندنی دەوڵەتی فەڵەستین تاکە رێگەی ئاشتییە

لەبارەی ئاشتی و شەڕی غەززەشەوە سەرۆک کۆماری عیراق وتی: پێویستە پەلە بکرێت لە راگرتنی شەڕی غەززە و دامەزراندنی دەوڵەتی فەلەستین تاکە رێگەیە بۆ گەیشتن بە ئاشتی لە رۆژهەڵاتی ناوەڕاست.

دەبێت حکومەتی سوریا رێز لە پێکەوەژیان بگرێت

لە درێژەی وتارەکەیدا د.لەتیف رەشید باسی رەوەشی سوریای کرد و رایگەیاند: پشتیوانی لە ئاسایش و یەكپارچەیی خاكی سوریا دەكەین و دەبێت حكومەتی سوریا رێز لە فرەیی و پێکەوەژیان بگیرێت.

PUKMEDIA