روانگەی سوری: لەنۆ مانگدا زیاتر لە 10هەزار کەس کوژراون

میدیاکان

سوریا

روانگەی سوری بۆ مافەکانی مرۆڤ بڵاویکردەوە لە ماوەی نۆ مانگدا و لەسەردەمی ئەحمەد شەرعدا زیاتر لە 10 هەزار کەس کوژراون کە لەنێویاندا زیاتر لە هەزار ژن و منداڵ هەن.

روانگەی سوری بۆ مافەکانی مرۆڤ راپۆرتێکی لەسەر دۆخی ئەمنی سوریا لەدوای روخانی رژێمی ئەسەد بڵاوکردووەتەوە، بەپێی راپۆرتەکە لە 8ی12ی2024 تا رۆژی 6ی9ی2025، 10 هەزار و 672 کەس کوژراون، لەو ژمارەیەش هەشت هەزار و 180 هاووڵاتی مەدەنین، هاوکات 438 کەسیان منداڵن و 620 کەسی دیکەشیان ژنن.

پەیوەست بە ژمارەی کوژراوانی کەسانی سەربازی، روانگەکە ئاشکرای کردووە، دوو هەزار و 492 سەرباز و چەکدار کوژراون.

روانگەی سوری روونیشی کردووەتەوە، کە سێ هەزار و 20 حاڵەتی کوشتنی راستەوخۆ و بە تەقەی هەڕەمەکی بووە، کە زیاتر لەسەر بنەمای نەتەوە و لایەنداری بووە، ئەوەی دیکەش بە تەقەی هەڕەمەکی و بۆردومانی ئیسرائیل و تورکیا و تەقینەوەی مین بووە، ئەمە جگە لەوەی بەشێک لە قوربانییەکان لە نێو زیندانەکان و لەژێر ئەشکەنجەدا کوژراون.

پەیوەست بە دەستگیرکراوان، روانگەی سوری ئاماژەی بەوەکردووە: تاوەکو ئێستا هەزارەها کەس بە ناڕەوا دەستگیرکراون کە لە نێویاندا ئەفسەری رژێمی پێشوو هەیە، بەبێ ئەوەی تۆمەتێکی دیاریکراویان ئاڕاستەکرابێت، یان دادگایی کرابن، کە ئەمەش پێشێلکارییەکی روونی پێوەرەکانی مافی مرۆڤە.

 لە کۆتایشدا روانگەی سوری بۆ مافەکانی مرۆڤ داوای کردووە رێکاری پێویست بۆ پاراستنی هاووڵاتیانی مەدەنی بگیرێتە بەر و لێپێچینەوەش لە تۆمەتباران بکرێت و کۆتایی بە هەڵمەتی بانگەشەی نەتەوایەتی و ناوزڕاندن بهێنرێت.

PUKMEDIA