ژمارەی قوربانیانی بومەلەرزەکەی ئەفغانستان بۆ نزیکەی شەش هەزارکەس بەرزدەبێتەوە

رۆیتەرز

رزگاربووانی بومەلەرزەکە ئاوارەبوون

دوو بومەلەرزەی بەهێز ئەفغانستانی هەژاند و بەپێی دواین ئاماری حکومەتی ئەو وڵاتە ژمارەی قوربانییەکان بۆ نزیکەی شەش هەزار کەس بەرزبووەتەوە و گەڕان و دەرهێنانەوەی تەرمی قوربانییەکان تا درەنگی شەوی رابردوو بەردەوامی هەبوو.

رۆژی یەکشەممە 31ی8ی2025، بوومەلەرزەیەک بە گوڕی 6 پلەی رێختەر و بە قوڵایی دە کیلۆمەتر  ویلایەتی کۆنار و ننکرهاری لە ئەفغانستان هەژاند، هاوکات رۆژی سێشەممە 2ی9ی2025، بوومەلەرزەیەکی دیکە بە گوڕی 5.5 پلەی رێختەر ئەو وڵاتەی هەژاند و بووە هۆی داڕمانی بەرد و گیرانی رێگای گوندەکان.

پەیوەست بە قوربانیانی هەردوو بومەلەرزەکە بەپێی ئاماری حکومەتی ئەفغانستان، تاوەکو ئێستا دوو هەزار و 200 کەس گیانیان لەدەستداوە و سێ هەزار و 600 کەسی دیکەش برینداربوون، کە تەنها لە ویلایەتی کۆنار دوو هەزار و 205 کەس گیانیان لەدەستداوە و سێ هەزار و 640 کەسی دیکەش برینداربوون، نەتەوەیەکگرتووەکانیش هۆشداری لە بەرزبوونەوەی ئاماری قوربانییەکان دا، بەو پێیەی نەتوانراوە تەرمی تەواوی قوربانییەکان لەژێر دار و پەردووی خانووە رووخاوەکان دەربهێنرێت.

پەیوەست بە زیانە مادییەکانیش، دەسەڵاتدارێتی ئەفغانستان ئاشکرای کرد؛ شەش هەزار و 700 ماڵ بە تەواوی داڕماون و زیاتر لە 84 هەزار هاووڵاتیش بەهۆی بوومەلەرزەکەوە زیانیان بەرکەوتووە، کە ژمارەیەکیشیان ئاوارە بوون.

PUKMEDIA