روانگەی سوری:زیاترلە 2هەزار و 500 کەس لەناوچەکانی حکومەتی دیمەشق بێسەروشوێنن

روانگەی سوری

پێشێلکارییەکان لە سوریا

لە سەرەتای ئەمساڵەوە زیاتر لە دوو هەزار و 500 کەس لە ناوچەکانی ژێر دەسەڵاتی حکومەتی دیمەشق رفێندراون و 235 ژنی دیکەش لەناوچەکانی سوەیدا رفێندراون و چارەنوسیان نادیارە ، روانگەی سوریش رایدەگەیەنێت:" ئەم پێشێلکارییانە بەهۆکاری سیاسی و ئەمنی بەردەوامی هەیە".

روانگەی سوری بۆ مافەکانی مرۆڤ لە راگەیەندراوێکیدا ئاشکرای کردووە: لەسەرەتای ئەمساڵەوە تاوەکو 30ی8ی2025، ژمارەی بێسەروشوێنەکان گەیشتووەتە هەزار و 364 کەس، هەروەها 865 کەسیش بە ناڕەوا دەستگیرکراون، ئەمە جگە لەوەی 283 کەسی دیکەش رفێندراون، بەمەش کۆی گشتی رفێندراو و بێسەروشوێنەکان گەیشتووەتە دوو هەزار و 512 کەس.

 پەیوەست بە هۆکاری ئەم پێشێلکارییانە، روانگەی سوری رایگەیاندووە: ئەم پێشێلکارییانە بۆ چەندین هۆکار دەگەڕێتەوە، لەوانە سەرکوتکردنی سیاسی و ئەمنی، کە زیاتر دژ بەو کەسانە ئەنجامدەدرێت کە پێدەچێت لایەنگریان بۆ حکومەتی پێشوو هەبێت.
دەشڵێت: ئەم کردەوانە وەک ئامرازی تیرۆری هاووڵاتیانی سڤیل بەکاردەهێنرێت، کە زیاتر بۆ کۆنترۆڵکردنی ناوچەیەکە، یان بۆ وەرگرتنی پارە و سەرانەیە.

پەیوەست بە دۆخی مرۆیی و پێشێلکارییەکان لە پارێزگای سوەیداش لە باشوری سوریا، روانگەی سوری رایگەیاندووە: بەهۆی ئاڵۆزییەکانەوە لەمانگی تەمووزدا 293 ژن لەو پارێزگایە رفێندراون، کە 42 ژنیان دوای رفاندنیان ئازادکراون، هەروەها دوو رفێندراویش لە زیندانەکانی عەدران لە دیمەشق، هەروەها 14 رفێندراوی دیکەش کوژراون، بەمەش 235 ژنی رفێندراو چارەنوسیان نادیارە.

PUKMEDIA