ئەمریکا ڤیزەی ئەندامانى رێکخراوی رزگاریخوازی فەلەستین و دەسەڵاتی فەلەستین رەتدەکاتەوە

میدیاکان

ئاڵاى ئەمریکا و فەلەستین

وەزارەتی دەرەوەی ئەمریکا لە بەیاننامەیەکدا رایگەیاند: کە ئەمریکا پێش بەڕێوەچوونی کۆبوونەوەی گشتی نەتەوە یەکگرتووەکان لە مانگی ئەیلولدا ڤیزەی ئەندامانی رێکخراوی رزگاریخوازی فەلەستین و دەسەڵاتی فەلەستین رەتدەکاتەوە و هەڵدەوەشێنێتەوە.

ئەمڕۆ هەینى 29ى8ى2025 وەزارەتی دەرەوەی ئەمریکا بەیاننامەیەکى بڵاوکردەوە کە، مارکۆ روبیۆ وەزیری دەرەوەی ئەمریکا ڤیزەی ئەندامانی رێکخراوی رزگاریخوازی فەلەستین (PLO) و دەسەڵاتی فەلەستین (PA) رەتکردەوە و هەڵیوەشاندەوە، ئەمەش پێش کۆبوونەوەی گشتی نەتەوە یەکگرتووەکان دێت و ئەم بڕیارە بەپێی یاسای ئەمریکا لە چوارچێوەی هەوڵەکانی ئیدارەی ترەمپ سەرۆکى ئەمریکایە بۆ لێپرسینەوە لە PLO و PA ، بەهۆی پابەندنەبوونیان بە بەڵێنەکانیان و تێکدانی ئاسۆی ئاشتی.

ئیدارەی ئەمریکا جەخت لەسەر ئەوە دەکاتەوە، کە بۆ ئەوەی PLO و PA وەک هاوبەشی ئاشتی سەیر بکرێن، پێویستە بەردەوام تیرۆر رەتبکەنەوە.

ئەم بڕیارە دەکرێت کاریگەری گەورەی هەبێت لەسەر پەیوەندییەکانی نێوان ئەمریکا و فەلەستین، هەروەها لەسەر پرۆسەی ئاشتی لە ناوچەکەدا و ببێتە هۆی زیادبوونی گرژییەکان لە نێوان فەلەستین و ئیسرائیل، هەروەها ئەمریکا.

هاوکات ئەم بڕیارە وەک فشارێکی سیاسی گەورە لەلایەن ئیدارەی ترەمپەوە سەیر دەکرێت بۆ ناچارکردنی فەلەستینییەکان بە قبوڵکردنی مەرجەکانی ئەمریکا و ئیسرائیل و  ئیدارەی ئەمریکا جەخت لەسەر ئەوە دەکاتەوە کە فەلەستینییەکان پێویستە "تیرۆر رەتبکەنەوە" بۆ ئەوەی وەک هاوبەشی ئاشتی سەیر بکرێن، ئەمەش خاڵێکی سەرەکی بووە لە سیاسەتی ئەمریکادا.

PUKMEDIA