وەفدێكی دارایی هەرێم بۆ پرسی مووچە گەیشتە بەغدا

PUKMEDIA

دراوی عیراقی

وەفدێكی تەكنیكی وەزارەتی دارایی و ئابووری هەرێمی كوردستان،  بۆ دەستپێكردنەوەی گفتوگۆكان لەبارەی مووچەی فەرمانبەران و كارەكانی لیژنە هاوبەشەكان، گەیشتە بەغدا.

ئەمڕۆ 6ی 8ی 2025، سەرچاوەیەك لە وەزارەتی دارایی و ئابووریی هەرێمی كوردستان، بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "لە كۆبوونەوەی دوێنێی ئەنجومەنی وەزیرانی عیراقدا داوا كرا وەفدێكی تەكنیكی وەزارەتی دارایی هەرێم بچێت بۆ بەغدا، ئەمڕۆش وەفدەكە گەیشتە بەغدا و سەردانەكەش  تایبەتە بە دەستپێكردنەوەی گفتوگۆكان لەبارەی مووچەی فەرمانبەران و كارەكانی لیژنە هاوبەشەكان و دەستپێكردنەوەیان".

ئەمەش لەكاتێكدایە، دوێنێ سێشەممە 5ی 8ی 2025، ئەنجومەنی وەزیرانی عیراق، كۆبوونەوەی ئاسایی خۆی ئەنجامدا كە بەشێكی تایبەت بوو بە پرسی نەوت و مووچەی هەرێمی كوردستان.

هاوكات هەر ئەمڕۆ، حەیان عەبدولغەنی جێگری سەرۆكی  ئەنجومەنی وەزیران بۆ كارووباری وزە و وەزیری نەوتی عیراق، لە كەركوك رایگەیاند: "گفتوگۆمان لەگەڵ هەرێم لەبارەی وەرگرتنی نەوت و هەناردەكردنی لەڕێگای كۆمپانیان سۆمۆوە بەردەوامە و ئێستا هەرێم نزیكەی 130 هەزار بەرمیل نەوتی رۆژانە بەرهەمدەهێنێت، لەو رێژەیە 50 هەزار بەرمیل نەوتی بۆ ناوخۆ دەبێت 80 هەزار بەرمیل لەرێی بەندەری جەیهانەوە هەناردەی وڵاتان دەكرێت"، وتیشی: "ئامادەین نەوتی هەرێم وەربگرین".

PUKMEDIA