روانگەی سوری: دزی و پێشێلکاریی گروپەچەکدارەکان لە عەفرین بەردەوامە

میدیاکان

شاری عەفرین

گروپە چەکدارەکانی لە شاری عەفرین بەردەوامن لە هێرشکردنە سەر هاووڵاتیانی مەدەنی و دزینی و سەروەت و سامانیان روانگەی سوریش بۆ مافەکانی مرۆڤ ئاشکرای دەکات:" لەم مانگەدا سێ تاوانی ئەشکەنجەدان و دزی رفاندن و هەڕەشە لە هاووڵاتیان تۆمار کراوە".

روانگەکە لە راپۆرتێکیدا ئاماژەی بەوەکردووە:" رۆژی 25ی7ی2025، چەکدارەکان گەنجێکی 20 ساڵانەیان لە گوندی جقماقی گەورە ئەشکەنجەداوە کە کاری چاودێری کردنی زەوییە کشتوکاڵییەکان بووە، هەروەها ماتۆڕسکیل و مۆبایل و پارەکەشیان بردووە".

روانگەی سوری ئاماژەی بە رووداوێکی دیکە کردووە و رایگەیاندووە:" رۆژی 22ی7ی2025، چەکدارەکان هاووڵاتییەکی 40 ساڵانەیان لە بازاڕی شارۆچکەی راجۆ بۆ ناوچەی ئەحراش رفاندووە، کە منداڵێکی لەگەڵدا بووە، دوای رفاندنیشی ئەشکەنجەدراوە و دەستیشیان بەسەر مۆبایل و پارە و ماتۆڕسکیلەکەیدا گرتووە".

بەپێی راپۆرتەکە:" رۆژی 10ی7ی2025، جوتیارێک لە گوندی عەتمان لەلایەن چەکدارەکانەوە ئەشکەنجەدراوە و بەسەختی بریندارکراوە، ئەمە جگە لەوەی دەست بەسەر ماتۆڕسکیل و مۆبایل و پارەکەیدا گیراوە و تۆمەتبار کراوە بەوەی سوکایەتی بە دەوڵەت کردووە".

 لە کۆتایشدا، روانگەی سوری بۆ مافەکانی مرۆڤ داوا دەکات:" لیژنەی لێکۆڵینەوە لە رووداوەکان پێکبهێنرێت و گەرەنتی پاراستنی مافی هاووڵاتیان بکرێت".

ماوەی شەش ساڵە شاری عەفرین  لە رۆژئاوای کوردستان، لەلایەن گروپە چەکدارەکان بەرێوەدەبرێت و لەو ماوەیەشدا هاووڵاتیانی شارەکە رووبەڕوی ئەشکەنجە و کوشتن و دزینی سەروەت و سامانیان بوونەتەوە.