پێنج هەزار خانەنشین پێنج مووچە بەیەكەوە وەردەگرن

PUKMEDIA

خانەنشینان

لەگەڵ دابەشكردنی مووچەی مانگی ئایاری خانەنشینان كە بڕیارە سبەینێ هەینی دابەشبكرێت، نزیكەی پێنج هەزار خانەنشین لە هەرێمی كوردستان پێنج مووچە بەیەكەوە وەردەگرن، وتەبێژی یەكێتی خانەنشینانی كوردستانیش رایدەگەیەنێت: "لە ئەمساڵدا نزیكەی 30 هەزار مووچەخۆر خانەنشین بوون".

سادق شێخ عوسمان وتەبێژی یەكێتی خانەنشینانی كوردستان، بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "چاوەڕواندەكرێت لەگەڵ دابەشكردنی مووچەی مانگی ئایاری مووچەخۆرانی هەرێم، ئەو خانەنشینانەی لە ئەمساڵدا خانەنشین كراون مووچەی مانگەكانی 1 و 2 و 3 و 4 و 5ی ئەمساڵ بەیەكەوە وەربگرن كە ژمارەیان نزیكەی پێنج هەزار خانەنشینە".

"لەو ژمارەیە هەزار و 150 خانەنشین لە پارێزگای سلێمانین و ژمارەكەی دیكەش لە پارێزگاكانی هەولێر و دهۆكن و لە ئەمساڵیشدا نزیكەی 30 هەزار فەرمانبەر لە سەرجەم وەزارەت و دەستە و دامەزراوەكانی حكومەتی هەرێم خانەنشین دەبن، هەروەها لەگەڵ دابەشكردنی مووچەی مانگی شەشیشدا نزیكەی 10 هەزار خانەنشینی دیكە مووچەی مانگەكانی رابردووی ئەمساڵ وەردەگرن، كە  نزیكەی دوو هەزار خانەنشینیان لە سنووری پارێزگای سلێمانین" سادق شێخ عوسمان وادەڵێت.

وتەبێژی یەكێتی خانەنشینانی كوردستان ئەوەشی خستەڕوو: "لەگەڵ دابەشكردنی مووچەی مانگی حەوتیشدا نزیكەی پێنج هەزار خانەنشینی دیكە مووچەی مانگەكانی رابردووی ئەمساڵ وەردەگرن كە هەزار و 300 خانەنشینیان لە سنووری پارێزگای سلێمانین".

راشیگەیاند: "ئەو خانەنشینانەی دیكەش كە دەمێننەوە، لەگەڵ دابەشكردنی مووچەی مانگەكانی داهاتوو خانەنشینییەكانیان پێدەدرێت و مووچەی هیچ مانگێكیان نافەوتێت".

بەهۆی جێبەجێكردنی یاسای خانەنشینی یەكگرتووی عیراقەوە، لە ئەمساڵدا نزیكەی 30 هەزار مووچەخۆر لە هەرێمی كوردستان خانەنشین بوون، لە هەرێمی كوردستان مامەڵەكانیان دواكەوت و لە ئەمساڵدا هیچ مووچەیەكیان پێنەدراوە، بەڵام لە دابەشكردنی مووچەی مانگی ئایارەوە هەر مانگە و ژمارەیەك خانەنشین مووچەكانیان بۆ دەگەڕێندرێتەوە و بە رەسمی ناویان دەچێتە لیستی خانەنشینانی عیراقەوە.

PUKMEDIA