زه‌هره‌ بجاری: فڕۆكه‌خانه‌ی سلێمانی فڕۆكه‌خانه‌یه‌كی گرنگی مه‌ده‌نییه‌ له‌عیراق

PUKMEDIA

کۆنگرەی رۆژنامەوانی لیژنه‌ی گواستنه‌وه‌ و گه‌یاندن له‌ ئه‌نجومه‌نی نوێنه‌رانی عیراق

لیژنه‌ی گواستنه‌وه‌ و گه‌یاندن له‌ ئه‌نجومه‌نی نوێنه‌رانی عیراق سه‌ردانی فڕ‌ۆكه‌خانه‌ی نێوده‌ڵه‌تی سلێمانی كردو سه‌رۆكی لیژنه‌كه‌ش رایگه‌یاند:" ده‌ستدرێژی بۆ سه‌ر فڕ‌ۆكه‌خانه‌ی سلێمانی و عه‌ربه‌ت كه‌ له‌ماوه‌ی رابردوودا ئه‌نجامدرا ره‌تده‌كه‌ینه‌وه‌، چونكه‌ فڕۆكه‌خانه‌ی نێوده‌وڵه‌تی سلێمانی فڕۆكه‌خانه‌یه‌كی مه‌ده‌نییه‌و یه‌كێكه‌ له‌فڕۆكه‌خانه‌ گرنگه‌كانی عیراق"، هاوكات ئه‌ندامێكی لیژنه‌ی گواستنه‌وه‌ و گه‌یاندنیش ده‌ڵێت:" هه‌نگاوی كرداریی ده‌نێین بۆ كردنه‌وه‌ی فڕۆكه‌خانه‌ی سلێمانی به‌ڕووی ئاسمانی توركیادا".

به‌هۆكاری سیاسی سزای خه‌ڵكی سلێمانی ده‌درێت

كاروان یاروه‌یس ئه‌ندامێكی لیژنه‌ی گواستنه‌وه‌ و گه‌یاندن له‌ ئه‌نجومه‌نی نوێنه‌رانی عیراق به‌ وێبسایتی ره‌سمی یه‌كێتیی نیشتمانیی كوردستان PUKMEDIA راگه‌یاند:" داخستنی ئاسمانی توركیا به‌ڕووی فڕۆكه‌خانه‌ی سلێمانیدا به‌هۆكاری سیاسییه‌و له‌گه‌ڵ ده‌ستپێكردنه‌وه‌ی دانیشتنه‌كانی ئه‌نجومه‌نی نوێنه‌راندا هه‌نگاوی كرداریی ده‌نێین بۆ چاره‌سه‌ری ئه‌و كێشه‌یه‌".

" ناكرێت به‌هۆكاری سیاسی سزای خه‌ڵكی سلێمانی بدرێت و ئه‌ركی ئه‌نجومه‌نی نوێنه‌رانه‌ هه‌نگاوی جدی بۆ چاره‌سه‌ركردنی ئه‌و كێشه‌ سیاسییه‌ بنێت" كاروان یاروه‌یس واده‌ڵێت.

ده‌ستدرێژییه‌كان بۆ سه‌ر فڕ‌ۆكه‌خانه‌ی سلێمانی ره‌تده‌كرێته‌وه‌

هه‌ر له‌و باره‌یه‌وه‌ زه‌هره‌ بجاری سه‌رۆكی لیژنه‌ی گواستنه‌وه‌ و گه‌یاندن له‌ ئه‌نجومه‌نی نوێنه‌رانی عیراق له‌میانی كۆنگره‌یه‌كی رۆژنامه‌وانیدا رایگه‌یاند: "ئێمه‌ وه‌ك ئه‌ندامانی په‌رله‌مان ده‌ستدرێژیی بۆ سه‌ر فڕ‌ۆكه‌خانه‌ی سلێمانی و عه‌ربه‌ت ره‌تده‌كه‌ینه‌وه‌ ئه‌گه‌ر له‌لایه‌ن هه‌ر وڵاتێكی دراوسێ یاخود ناوچه‌كه‌ ئه‌نجامبدرێت، هه‌ر ده‌ستدرێژییه‌ك بۆ سه‌ر خاكی عیراق پێشێلكردنی سه‌روه‌ری عیراقه‌و ره‌تیده‌كه‌نه‌وه‌و به‌ ره‌سمیش ئه‌و هه‌ڵوێسته‌مان راگه‌یاندوه‌" .

ئاماژه‌ی به‌وه‌شكرد:"ئه‌مڕ‌ۆ له‌سه‌ردانه‌كه‌ماندا ته‌واوی به‌شه‌كانی فڕ‌ۆكه‌خانه‌ی سلێمانیان به‌سه‌ركردوه‌ته‌وه‌ و فڕ‌ۆكه‌خانه‌كه‌ یه‌كێكه‌ له‌فڕ‌ۆكه‌خانه‌ مه‌ده‌نییه‌ گرنگه‌كانی عیراق".

35%ی گه‌شته‌كانی فڕۆكه‌خانه‌ی سلێمانی راگیراوه‌

هه‌ر له‌كۆنگره‌ رۆژنامه‌واییه‌كه‌دا هه‌ندرێن هیوا به‌ڕ‌ێوه‌به‌ری فڕ‌ۆكه‌خانه‌ی نێوده‌وڵه‌تی سلێمانی رایگه‌یاند: "35%ی گه‌شته‌كانمان راگیراوه‌ به‌هۆی راگرتنی گه‌شته‌كان به‌سه‌ر ئاسمانی توركیادا، له‌ماوه‌ی 14 مانگی رابردوودا نزیكه‌ی 10 ملیۆن دۆلار زیانی داراییمان به‌ركه‌وتووه‌، جگه‌ له‌ گومرگ و پاسپۆرت و ره‌گه‌زنامه‌".

ئه‌وه‌شی خسته‌ڕ‌وو: "هیچ كێشه‌یه‌كی ئه‌منی و سه‌ربازیمان نییه‌ له‌ فڕ‌ۆكه‌خانه‌ی سلێمانی و ئێمه‌ هه‌موو كات ئاماده‌یی خۆمان بۆ هه‌موو رێكارێك راگه‌یاندوه‌و هیچ كێشه‌یه‌كمان نییه‌، به‌ڵگه‌ش بۆ ئه‌وه‌ هه‌موو گه‌شته‌كانی دیكه‌ی وڵاتان به‌رده‌وامه‌، كۆمپانیای گه‌وره‌ له‌ سلێمانی كارده‌كات و هیچ كێشه‌یه‌كمان نییه‌ و ئێمه‌ ئاماده‌ین بۆ لێكۆڵینه‌وه‌".
PUKMEDIA