لەهەولێر و دهۆک رێگریکردن لەگەڕاندنەوەی ئاوارەکان بەردەوامە

PUKMEDIA

کەمپی ئاوارەکان

ماوەی زیاتر لە مانگێک لەبەردەم ئاوارەکاندا ماوە بۆ گەڕانەوەیان بۆ زێدی خۆیان بەوەرگرتنی بڕی چوار ملیۆن دینار و چەند ئامێرێکی کارەبایی ناوماڵ، وەک قەرەبوو، لەدوای ئەو وادەیە بێبەش دەبن لەو قەرەبووە، ئەمەش لەکاتێکدایە چەندین جار وەزیری کۆچ و کۆچبەرانی عیراق رایگەیاندووە، 'لە هەولێر و دهۆک رێگری و لە سلێمانیش ئاسانکاریمان بۆ دەکرێت'.

ئیڤان فایەق وەزیری کۆچ و کۆچبەرانی عیراق لەلێدوانێکی رۆژنامەونیدا رایگەیاندوە: "بەپێی ئەو وادەیەی کە حکومەتی فیدراڵ دایناوە، کار بۆ داخستنی سەرجەم کەمپی ئاوارەکان دەکرێت لەهەرێمی کوردستان، بەڵام هێشتا رووبەرووی رێگریکردن لە کارمەندەکانمان دەبینەوە لە شارەکانی هەولێر و دهۆک و ئەمەش رێکارەکان دوادەخات و کارەکانمان قورس دەکات".

"لەرێگای سەرۆک وەزیرانی عیراقەوە هەوڵدەدەین ئەم پرسە لەگەڵ هەرێمی کوردستان کۆتایی بێنین، کەوەک چۆن لە سلێمانی هاوکاری و کارئاسانیمان بۆ دەکرێت، بەو جۆرەش لەهەولێر و دهۆک مامەڵەمان لەگەڵ بکەن"، ئیڤان فایەق وای وت.

رێگرییەکان لەهەولێر و دهۆک بەردەوامە

هەر لەو بارەیەوە سامر مه‌شكور به‌ڕ‌ێوه‌به‌ری به‌شی پارێزگاكانی هه‌رێمی كوردستانی وه‌زاره‌تی كۆچ و كۆچبه‌رانی عیراق له‌ لێدوانێكی تایبه‌تدا پێشتر به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاندبوو: "بۆ گه‌ڕ‌اندنه‌وه‌ی ئاواره‌كان به‌راورد به‌ هه‌ولێرو دهۆك له‌پارێزگای سلێمانی زیاتر هاوكاری و كارئاسانیمان بۆده‌كرێت، ئه‌مه‌ش ده‌گه‌ڕ‌ێته‌وه‌ بۆ ئه‌وه‌ی كه‌ كه‌مپه‌كانی هه‌ولێرو دهۆك له‌ژێر كۆنترۆڵی وه‌زاره‌تی ناوخۆی حكومه‌تی هه‌رێمی كوردستاندان".

لەسەر ئاستەنگییەکان سکاڵا تۆمارکراوە

وەزیری کۆچ و کۆچبەرانی عیراق لەسەر ئەو ئاستەنگی و رێگرییانەی بۆ گەڕانەوەی ئاوارەکان لە هەولێر و دهۆک دروستکرابوون، لە دادگای فیدراڵی سکاڵای لەسەر سەرۆکی ھەرێم و سەرۆکی حکومەتی ھەرێم و وەزیری ناوخۆی ھەرێم تۆمارکردووە.

حکومەتی عیراق تێچووی گەڕانەوەی ئاوارەکان لەئەستۆدەگرێت

وەزارەتی كۆچ و كۆچبەرانی عیراق پلانێكی گشتگیری بۆ كۆتاییهێنان بە پرسی ئاوارەكان داڕشتووە و پێویستە تا کۆتایی مانگی تەمموزی ئەمساڵ سەرجەم ئاوارەکانی هەرێمی کوردستان بگەڕێنەوە بۆ زێدی خۆیان، وەک هاندانێک بۆ گەڕانەوەشیان، جگە لە ئاوەدانکردنەوەی ناوچەکانیان و دابینکردنی تێچووی گەڕانەوەیان بڕی 4 ملیۆن دینار و چەندین خزمەتگوزاریی دیکە بۆ هەر خێزانێک دابیندەکات، هەروەها هەر خێزانێکی ئاوارە لە دوای 30ی تەممووزەوە بگەڕێتەوە زێدی خۆی، لە پێدانی هاوکارییەکان بێبەش دەبێت.

PUKMEDIA