ئەمڕۆ وادەی تۆمارکردنی لیست و کاندید بۆ پەرلەمان کۆتایی دێت

PUKMEDIA

لۆگۆی کۆمسیۆنی باڵای سەربەخۆی هەڵبژاردنەکان

بڕیارە ئەمڕۆ 13/6/2024 دەرگای تۆمارکردنی لایەنە سیاسییەکان بۆ هەڵبژاردنی خوولی پەرلەمانی کوردستان دابخرێت، کە رۆژی 8/6 دەرفەتی تۆمارکردن بەرووی لایەنە سیاسییەکان بۆ ماوەی 6 رۆژ کرایەوە.

کۆمسیۆنى باڵاى هەڵبژاردنەکانى عیراق  دەرگاى تۆمارکردنى بۆ هاوپەیمانێتیی، حزب، کاندیدی تاک و کاندیدی پێکهاتەکان کردەوە بە مەبەستی بەشداریکردن لە هەڵبژاردنى خوولی پەرلەمانى کوردستان و لەو دەرفەتەدا پارتی دیموکراتی کوردستان ناوی حزب و بەربژێرەکانی پێشکەشکرد.


سەرۆکى ئەنجوومەنى کۆمیسیارانى کۆمسیۆنى هەڵبژاردنەکان لە 28ى ئایار دا بە نوسراوێک داواى لە سەرۆکایەتى هەرێمى کوردستان کرد، وادەیەکى نوێ بۆ هەڵبژاردنى پەرلەمان دیاریبکات و کۆمسیۆن پێشنیازى رۆژى پێنجى ئەیلولى  ئەمساڵی کرد.

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند: "پێویستە بەزووترین کات مەرسومێکی نوێ بۆ هەڵبژاردنی خوولی شەشەمی پەرلەمانی کوردستان دەربچێت، تاوەکو کۆمسیۆن بۆ بەڕێوەبردنی پرۆسەکە کاتی پێویستی لەبەردەستدابێت".

بڕیاربوو 10/6ی ئەمساڵ و بەپێی مەرسوومی چوارەمی سەرۆکی هەرێم هەڵبژاردن بۆ پەرلەمانی کوردستان بەرێوەبچوایە، بەڵام بەهۆی تانەیەکی مەسرور بارزانی، ئاستەنگ بۆ ئەو وادەیە و پرۆسەکە دروستکرا و نئەنجام نەدرا، بۆیە دەستپێکردنەوەی پرۆسەکە پێویستی بە مەرسومی پێنجەمە.

PUKMEDIA