زیاتر لە ١٤٣ هەزار کارتی دەنگدان بۆ هەرێم دەگەڕێنرێتەوە

PUKMEDIA

پرۆسەی دەنگدان و کارتی تۆماری بایۆمەتری

کۆمسیۆنی باڵای سەربەخۆی هەڵبژاردنەکانی عیراق بەردەوامە لە چاپکردنی کارتی دەنگدەران و بڕیارە لەهەفتەی داهاتودا زیاتر لە ١٤٣ هەزار کارتی دەنگدان لەهەرێمی کوردستان بدرێنەوە بە دەنگدەران، وتەبێژی کۆمسیۆنیش دەڵێت:" بۆ ئە مەبەستە ١٧٣ بنکەی دەنگدانمان ئامادەکردووە".

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" لە ١-٢ تا ١٠-٣-٢٠٢٤ کارتی دەنگدانی ١٤٣ هەزار و ٦٣٢ دەنگدەر  لە هەرێمی کوردستان گەڕاوەتەوە".

" لەپارێزگای هەولێر ٦٧ هەزار و ٤٧٦ کارتی دەنگدان و لەپارێزگای سلێمانیش ٤٢ هەزار و ٨٥٦ کارتی دەنگدان و لەپارێزگای دهۆکیش ٣٣ هەزار و ٣٠٠ کارتی دەنگدان تەواوبووە و گەڕێنراوەتەوە بۆ بنکەکان"، وتەبێژی کۆمسیۆنی باڵای سەربەخۆی هەڵبژاردنەکانی عیراق وایوت.

جومانە غەلای ئاماژەی بەوەشکرد:" بڕیارە دوای وردبینی بۆ کارتەکان لەهەفتەی داهاتوودا لەرێگەی  ١٧٣ بنکەی دەنگدانەوە لەهەرێمی کوردستان کارتەکان بدرێنەوە بە دەنگدەران".

ئەمەش لەکاتێکدایە کۆمسیۆنی باڵای سەربەخۆی هەڵبژاردنەکانی عیراق بەنوسراوی رەسمیی، کە کۆپییەکی بۆ PUKMEDIA نێردرابوو داوای لەسەرۆکایەتی هەرێمی کوردستان کردووە وادەیەکی نوێ بۆ ئەنجامدانی هەڵبژاردنی پەرلەمانی کوردستان دیاریبکات، هاوکات پێشنیازیشی کردبوو رۆژی ٥ ئەیلولی ئەمساڵ وەک رۆژی هەڵبژاردنی گشتی دەستنیشان بکات.

PUKMEDIA