یەکێتی تانە لەبڕیارەکەی کۆمسیاران دەدات

PUKMEDIA

لۆگۆی یەکێتیی نیشتمانیی کوردستان

لێپرسراوی مەکتەبی هەڵبژاردنەکان و ناوەندی کاروباری یاسایی یەکێتیی نیشتمانیی کوردستان، لە دەستەی دادوەری کۆمسیۆن تانە لە بڕیارەکەی کۆمسیاران بۆ هەڵپەساردنی کارە هونەریی و داراییەکانی هەڵبژاردنی پەرلەمانی کوردستان دەدەن و راشیدەگەیەنن: "ئەو بڕیارە بە سیاسیی دراوە، نەک بە یاسایی".

رزگار حەمە: بڕیارەکەی کۆمسیاران نایاساییە

رزگار حاجی حەمە لێپرسراوی مەکتەبی هەڵبژاردنەکانی یەکێتی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" تانەکەمان لەبڕیارەکەی ئەنجومەنی کۆمسیارانە، چونکە بڕیارەکە لەڕووی یاسایی و سیاسییەوە لەبەرژەوەندی دیموکراسی هەرێمی کوردستاندا نییە".

"بڕیارەکەش لەکاتێکدایە، کە بەپێی دەستوور نابێت هیچ سکاڵاو تانەیەک لەبارەی هەڵبژاردنەوە بدرێت، لەکاتێکدا کە ٦ مانگ بەسەر بڕیاری ئەنجامدانی هەڵبژاردندا تێپەڕیوە و سکاڵاکەی مەسرور بارزانیش لەکاتێکدابووە، کە چەند رۆژێکی کەمی ماوە بۆ دەستپێکردنی بانگەشەی هەڵبژاردن، کە بەبۆچوونی ئێمە ئەو کارە بۆ دواخستنی هەڵبژاردن بووە، نەک تانەدان لە دابەشکردنەوەی کورسییەکان"، رزگار حاجی حەمە وایوت.

تەلار لەتیف: بڕیارەکەی کۆمسیاران کاریگەری سلبی دەبێت

دادگای فیدراڵی ئەو ماددەیەی تایبەتە بە دابەشکردنەوەی کورسییەکانی پەرلەمانی کوردستان رادەگرێت و ئەنجومەنی کۆمسیارانیش بڕیارێکی دیکە دەدات و بەشێک لە کارە هونەری و داراییەکانی هەڵبژاردنی پەرلەمانی کوردستان هەڵدەپەسێرێت.

تەلار لەتیف لێپرسراوی ناوەندی کاروباری یاسایی یەکێتیی نیشتمانیی کوردستان بە وێبسایتی PUKMEDIA ی راگەیاند:" لەڕێگەی رزگار حاجی حەمە، کە نوێنەری قەوارەی سیاسیمانە تانەمان لەبڕیارەکەی کۆمسیاران داوە، چونکە بەپێی فەرمانە وەلائییەکەی دادگای فیدراڵی، کە لەسەر بڕگەی دوو لە ماددەی دووە و تایبەتە بە دابەشکردنەوەی کورسییەکانی پەرلەمان بەسەر بازنەکاندا، نەک هەڵپەساردنی بەشێک لەپرۆسەی هەڵبژاردن وەک لە بڕیارەکەی کۆمسیاراندا هاتووە".

"بڕیارەکەی کۆمسیاران کاریگەری سلبی لەڕووی سیاسی و یاسایی و ماددییەوە بۆ ئێستا و داهاتووی پرۆسەی دیموکراسی لەهەرێمی کوردستان دەبێت، کە یەکێتیی نیشتمانیی کوردستان بەهیچ جۆرێک لەگەڵ ئەو بڕیارەدا نییە، کە دەبێتە هۆی دواخستن و راگرتنی هەڵبژاردن، بەپێچەوانەوە دەمانەوێت هەڵبژاردن لەو وادەیەدا بەڕێوەبچێت کە سەرۆکی هەرێم دیاریکردووە"، تەلار لەتیف وایوت.

بوێری بەشداریکردنیان نییە و بیانوو دەگرن

لێپرسراوی ناوەندی کاروباری یاسایی یەکێتیی نیشتمانیی کوردستان ئاماژەی بەوەشکرد:" ناکرێت حزبێکی سیاسی کە بوێری بەشداریکردنی لەهەڵبژاردندا نییە، بە بیانووی جۆراوجۆر هەوڵی دواخستن و پەکخستنی پرۆسەکە بدات، لەکاتێکدا تا دوێنێ ئەو حزبە، بڕوای بەبڕیارەکانی ئەو دادگایە نەبووە کە سکاڵاکەی لێ تۆمارکردووە".

تەلار لەتیف وتیشی:" نییەتی پارتی دواخستنی هەڵبژاردنە، نەک تانەدان لە هیچ ماددەیەک، ئەگەر مەبەستیان دواخستنی هەڵبژاردن نەبوایە دەیانتوانی تانە لە بڕیار و رێنماییەکانی کۆمسیۆن لەبەردەم دەستەی تەمیزی تایبەت بە کۆمسیۆن بدەن، کە لە سێ دادوەر پێکهاتوون".

تانەکەی یەکێتیی نیشتمانیی کوردستان ئاڕاستەی دەستەی دادوەری کۆمسیۆن کراوە و تێیدا تیشکی خراوەتەسەر فەرمانە وەلائییەکەی دادگای فیدراڵی، کە لەبڕیارەکەی کۆمسیاراندا وردتر بڕیاری لەو فەرمانە داوە و بەشێک لە کارەکانی هەڵبژاردنی پەرلەمانی کوردستانی هەڵپەساردووە، یەکێتیش هەموو رێککارێکی یاسایی دەگرێتەبەر بۆ ئەوەی هەڵبژاردن دوانەخرێت و لەو وادەیەدا ئەنجام بدرێت، کە سەرۆکی هەرێمی کوردستان مەرسومی بۆ دەرکردووە.

20 حزب و دوو هاوپەیمانێتی ناویان تۆمارکردبوو

بەپێی زانیارییەکانی PUKMEDIA هەتا رۆژی 14-3-2024 کە دوا وادەبوو بۆ تۆمارکردنی ناوی حزب و هاوپەیمانێتییەکان، لە کۆمسیۆنی باڵای سەربەخۆی هەڵبژاردنەکانی عیراق، 20 حزب و دوو هاوپەیمانێتی ناویان بۆ هەڵبژاردنی پەرلەمان تۆمارکرد، کە تەنها پارتی دیموکراتی کوردستان ئامادەنەبوو ناوی کاندیدەکانی پێشکەش بکات، لەبەرامبەریشدا سەرجەم حزبەکانی تر ئامادەییان بۆ هەڵبژاردن لەوادەی خۆیدا نیشانداوەو ناوی کاندیدەکانیان پێشکەش بە کۆمسیۆن کردووە.

PUKMEDIA