سەعدی پیرە: یەکێتی کۆنفرانسی رێکخستنەوەی مەڵبەندەکان دەکات

PUKMEDIA

وتەبێژی یەکێتیی نیشتمانیی کوردستان

ئەمڕۆ پێنج شەممە 19-10-2023 مەکتەبی سیاسی یەکێتیی نیشتمانیی کوردستان بە سەرپەرشتی بافڵ جەلال تاڵەبانی سەرۆکی یەکێتیی نیشتمانیی کوردستان کۆبوەوەو تاوتوێی چەند پرسێکی گرنگی کرد.

پاش کۆتایی هاتنی کۆبونەوەکە سەعدی ئەحمەد پیرە وتەبێژی یەکێتیی نیشتمانیی کوردستان لە کۆنگرەیەکی رۆژنامەوانیدا رایگەیاند: "لەدوای پێنجەمین کۆنگرە یەکێتیی نیشتمانیی کوردستان بڕیاریدا پێداچونەوە بەهەیکەلی حزبی خۆیدا بکات، بەتایبەت لە ئێستادا کەلەبەردەم دوو هەڵبژاردندایە، لەو چوارچێوەیەشدا بڕیاری داوە کۆنفرانسی مەڵبەندەکان ببەستێت و رێکخستنەوە بۆ مەڵبەندەکان بکرێت، تەنانەت مەکتەبی رێکخستن دەتوانێت، ئەگەر پێویستبێت مەڵبەندی نوێ بکاتەوە".

"هەوڵدەدەین رێکخستنەوەی مەڵبەندەکان بگونجێت لەگەڵ بازنەکانی هەڵبژاردن، ئەمەش لەپێناو ئەوەی بتوانین لە رێگەی مەڵبەندەکانەوە هەوڵی خزمەتکردنی زیاتری خەڵک و سەرخستنی بەرنامە و پرۆگرامی یەکێتی بۆ هەڵبژاردن بدەین، ئەمەش لەکاتێکدایە کە ماوەی چەند رۆژێکە لەلایەن مەکتەبی رێکخستنەوە کاروبارەکانی رێکخستنەوەی مەڵبەندەکان دەستیپێکردووە"، سەعدی پیرە وای وت.

سەبارەت بە سەردانی وەفدی باڵای یەکێتی بۆلای لایەنەکان لەدوای پێنجەمین کۆنگرە، وتەبێژی یەکێتی رایگەیاند: "وەفدەکە بەسەرۆکایەتی سەرۆک بافڵ دەبێت و لێپرسراوی مەکتەبی پەیوەندییەکان راسپێردراوە ئامادەکاری بکات لە هەفتەی داهاتووەوە دیدار و سەردانەکان بۆلای لایەنەکان رێک بخات، کەمەبەست لێی هەڵوێستی جدی یەکێتیی نیشتمانیی کوردستانە، لەبارەی یەکدەنگی و یەکڕیزی و خزمەتی هاووڵاتییان".

هاوکات وتەبێژی یەکێتی راشیگەیاند: "پەیوەندیمان لەگەڵ سەرجەم لایەنە کوردستانییەکان باشە، ئەگەر جیاوازییەکی بیروبۆچونیشمان هەبێت لەگەڵ لایەنەکان لەبارەی خزمەتکردنی خەڵکەوەیە و کەئامانجی سەرەکیشمانە بۆ چونمان بۆلای لایەنەکان".

PUKMEDIA