شێخ جەعفەرو کۆنسوڵی فەرەنسا پرسی پێکهێنانی حکومەتی نوێ تاوتوێ دەکەن

راگەیاندنی شێخ جەعفەر شێخ مستەفا

جێگری سەرۆکی هەرێم لەگەڵ کونسوڵی گشتیی فەرەنسا کۆبووەوە

ئەمڕۆ دووشەممە 6ی 7ی 2026،  شێخ جەعفەر شێخ مستەفا، جێگری سەرۆکی هەرێمی کوردستان پێشوازیی لە بەڕێز یان برێم، کونسوڵی گشتیی فەرەنسا لە هەرێمی کوردستان، کرد.

لە کۆبوونەوەکەدا، باس لە په‌يوه‌ندييه‌كانى عێراق و هەرێمی کوردستان لەگەڵ فەرەنسا کرا، کە تیایدا گرنگیی بەردەوامی و فراوانکردنی پەیوەندییەکان لە هەموو بوارەکاندا، دووپات کرایەوە، هەروەها سەبارەت بە کێشە و گیروگرفتەکانی هەولێر ـ بەغدا، جەخت لە بەردەوامبوونی گفتوگۆ و دانوستاندنەکان و چارەسەرکردنی کێشەکان بەپێی دەستوور، کرایەوە.

پێکهێنانی کابینەی نوێی حکومەتی هەرێمی کوردستان و خستنەڕووی دوا هەوڵ و هەنگاوەکانی پرۆسەکە، هەروەها هەڵسەنگاندنی رەوشی گشتیی ناوچەکە، دوو تەوەری دیکەی گفتوگۆکان بوون کە بیروڕا لەبارەیانەوە ئاڵوگۆڕ کرا.

PUKMEDIA