عەباس عێراقچی: بەرەو پێشچوونی باش لە دانوستانەکاندا هەیە

میدیاکان

عەباس عێراقچی، وەزیری دەرەوەی ئێران

وەزیری دەرەوەی ئێران، رایدەگەیەنێت گەڕی ئەمجارەی دانوستانەکان لەگەڵ ئەمریکا یەکێک بووە لە باشترین گەڕەکان، کە گفتوگۆکان زۆرترین ماوەی خایاندووە و  تیایدا تاران داواکارییەکانی خۆی بە روونی ئاڕاستەی لایەنی ئەمریکی کردووە .

عەباس عێراقچی، وەزیری دەرەوەی ئێران ، ئاماژەی بەوەشکرد: بەرەوپێشوەچوونی باش لە دۆسیەی ئەتۆمی و هەڵگرتنی سزاکاندا بەدەستهاتووە.

دانوستانی ئەمجارە نزیکەی پێنج سەعاتی خایاند و تێیدا هەموو خاڵە ناکۆکەکان  باس کران،بەڵام بە وتەی وەزیری دەرەوەی ئێران،هێشتا هەندێک خاڵ ماون لەسەری رێکبکەون کە  جیاوازی و ناکۆکییە لە نێوان هەردوو وەفدەکەدا.

لە بارەی بەرەو پێشچوونی دانوستانەکانیش،عێراقچی ئاشکرای کردووە: ئەم جارە باشترین گەڕی دانوستانەکان بووە و هەردوو لا جدی بوون لە دانوستانەکەدا ، بڕیارە رۆژی دووشەممەی داهاتوو لە ڤییەنا ، گفتوگۆی تەکنیکی لەگەڵ شارەزایانی ئاژانسی نێودەوڵەتی وزەی ئەتۆم بۆ تاوتوێکردنی وردەکارییە پسپۆڕییەکان ئەنجام بدرێت.

لەلایەکی دیکەوە، بەدر بوسەعیدی، وەزیری دەرەوەی عومان کە وڵاتەکەی نێوەندگیری لە نێوان ئەمریکا و ئێراندا دەکات، لە پۆستێکیدا کە لە پلاتفۆڕمی ئێکس بڵاویکردووەتەوە، رایگەیاند : پێشکەوتنێکی زۆر گرنگ لە دانوستاندنەکانی نێوان تاران و واشنتن بەدیهاتووە. 

ئاماژەی بەوەشکرد، لە کۆبوونەوەکانی جنێڤدا: هەردوولا کراوەییەکی بێپێشینەیان نیشان داوە.

 وەزیری دەرەوەی عومان، لە کۆتایشدا  دووپاتی کردەوە: کە  گفتوگۆکان لەسەر ئاستی تەکنیکی هەفتەی داهاتوو لە شاری ڤییەنا بەردەوام دەبن.

ئەمەش لەکاتێکدایە، پێش دانوستانی رۆژی پێنج شەممە، گرژی نێوان هەردوو وڵات گەیشتبووە بەرزترین ئاست،ناکۆکی نێوان هەردوو وڵات لەسەر بەرنامەی ئەتۆمی و هەژمونی ئێران لە ناوچەکە و هەڵگرتنی سزا سەپێندراوەکاندایە، کە هێشتا لەسەر ئەم خاڵانە نەگەیشتوونەتە رێککەوتنی کۆتایی.

PUKMEDIA