ئۆجەلان: بۆ سەرخستنی پرۆسەی ئاشتی پێویستمان بە هەنگاوی یاساییە

میدیاکان

عەبدوڵڵا ئۆجەلان

عەبدوڵڵا ئۆجەلان رێبەری زیندانیکراوی پارتی کرێکارانی کوردستان، لە پەیامێکی نوێدا رایدەگەیەنێت: پەیوەندی کورد و تورک مێژووییە و پێویستە ماف بە گشت پێکهاتەکان بدرێت ،دووپاتیشی دەکاتەوە بۆ سەرخستنی پرۆسەی ئاشتی پێویستمان بە هەنگاوی یاساییە.

ئەمڕۆ 27ی2ی2026، پارتی یەکسانی و دیموکراسی گەلان (دەم پارتی)، لە کۆنگرەیەکی رۆژنامەوانیدا لە هۆڵی "یەڵماز گۆنای" لە چانکایەی ئەنکەرە، پەیامی نوێی عەبدوڵڵا ئۆجەلان، رێبەری پارتی کرێکارانی کوردستانی بەبۆنەی ساڵیادی دەستپێکردنی پڕۆسەی ئاشتی بڵاوکردەوە.

ئۆجەلان لە پەیامەکەیدا رایگەیاند: تورک بێ کورد و کوردیش بێ تورک نابن، ئەم دیالەکتیکی پەیوەندییە خاوەن کارەکتەرێکی مێژوویی ڕەسەنە، نووسینە بنەڕەتییەکان لە پڕۆسەی دامەزراندنی کۆماردا، یەکێتیی تورک و کوردیان نیشان دەدا.

ئاماژەی بەوەشکرد:بانگەوازەکەمان لە ٢٧ی شوباتدا هەوڵێکە بۆ زیندووکردنەوەی ئەو ڕۆحی یەکێتییە و داواکارییەکە بۆ کۆمارێکی دیمۆکراتیک.

لە بارەی قۆناغی ئێستاشەوە، ئۆجەلان رایگەیاندووە: ئێستا دەبێت لە قۆناغی نەرێنییەوە بەرەو قۆناغی ئەرێنیی بنیادنان هەنگاو بنێین، ئامانجمان ئەوەیە سەردەمی سیاسەتی توندوتیژی کۆتایی پێ بهێنین و پڕۆسەیەک لەسەر بنەمای کۆمەڵگەی دیموکراتیک و سەروەریی یاسا بکەینەوە.

روونیشی کردووەتەوە: زۆرێک لەو کێشە و قەیرانانەی ئەمڕۆ ڕووبەڕوویان دەبینەوە، بەهۆی نەبوونی یاسایەکی دیموکراتیکەوە دروست بوون، ئێمە لە چوارچێوەی سیاسەتی دیموکراتیکدا بەرگری لە چارەسەرێکی یاسایی دەکەین.

 هەر لە پەیامەکەیدا، ئۆجەلان دووپاتی کردووەتەوە: هاووڵاتیبوون دەبێت لەسەر بنەمای پەیوەستبوون بە دەوڵەتەوە بێت، نەک لەسەر بنەمای ئینتیما بۆ نەتەوەیەک، ئێمە بەرگری لە هاووڵاتیبوونێکی ئازاد دەکەین کە سەرکردایەتیی ئازادیی ئایین، نەتەوە و بیروڕا بکات، وەک چۆن ئایین و زمان ناسەپێنرێن، نابێت نەتەوەبوونیش بسەپێنرێت.

 لە کۆتایشدا، لە بارەی پرسی ژنان و مافەکانیانەوە و رۆڵیان لە کۆمەڵگە، عەبدوڵڵا ئۆجەلان رایگەیاندووە: ژن هێزێکی کۆمەڵایەتیی پێشەنگە کە هیچ کۆمەڵگە یان دەوڵەتێک بەبێ لەبەرچاوگرتنی ئەوان ناتوانێت بەردەوام بێت، ئەمڕۆ توندوتیژیی ناوخێزانی، کوشتنی ژنان و چەوسانەوەی باوکسالاری، هەموویان نیشانە هاوچەرخەکانی ئەو هێرشە مێژووییەن کە بە کۆیلەکردنی ژنان دەستی پێ کردووە. لەبەر ئەوە، ژنان ئازادیخوازترین پێکهاتە و هێزی بەهێزکردنی یەکگرتنی دیموکراتیکن.

PUKMEDIA