قائیمقامی سلێمانی دڵنیایی دەدات لە مریشکی خۆماڵی

PUKMEDIA

کۆنگرەی قائیمقامیەتی سلێمانی

قائیمقامی سلێمانی چەند راستییەک بڵاودەکاتەوەو رایدەگەیەنێت: دڵنیایی دەدەینە هاووڵاتیان مریشک لە پارێزگای سلێمانی هیچ مەترسییەکی نییە و خۆمان بەکاری دەهێنین، بەداخەوە کەناڵەکانی راگەیاندن شەڕی میدیایی بەرامبەر سلێمانی دەکەن.

فازیڵ عومەر قائیمقامی سلێمانی بەوەکالەت لە کۆنگرەیەکی رۆژنامەوانیدا لەبارەی هەواڵی بڵاوبونەوەی نەخۆشی بەهۆی مریشکی کێڵگە پەلەوەرییەکانی سلێمانی رایگەیاند: نیگەرانین بەرامبەر کۆمەڵێک کەناڵ و میدیا، کە راستییەکان وەک و خۆی ناگەیەنن و شەڕی راگەیاندن بەرامبەر سلێمانی دەکەن، داوا لە لایەنی پەیوەندیدار دەکەین چاودێری کەناڵ و میدیا بن، تا بەهۆی هەواڵەکانیانەوە زیان بەهەرێم نەگات.

ئاماژە بەوەشدرا: خۆشبەختانە پێشوەختە دەزگای ئاسایش دەستیگرت بەسەر جۆرێک دەرماندا کە خەریکبوو بەسەر کێڵگە پەلەوەرییەکانی سلێمانی بڵاوببێتەوە، کە زیاتر لە 700 کێڵگەی پەلەوەری لەم سنورە هەیە و 18 خاوەن کێڵگە بەنیازببون بەکاری بهێنن، کە ئەوەش بەچەند هۆکارێک فریای بەکارهێنان نەکەوتون و ئەوانەشی بەکاریان هێناوە بەچەند هۆکارێک مریشکەکانیان نەگەیشتوەتە بازاڕ و دەستیانبەسەرداگیراوە.

لەلایەکی ترەوە رایگەیاند: تەئکید ئەکەینەوە هیچ مەترسییەک لەسەر هاووڵاتیان نییە و خۆمان مریشکی بازاڕ بەکاردەهێنین کە مریشکێکی سەلامەتە، ئەو کێڵگانەش کە بەنیازبون یان دەرمانەکانیان بەکارهێناوە، دەزگای ئاسایش پاش ئەوەی پێی زانیوە دەستیبەسەرهەموو ئەو قائانەدا گرتوەو بەهیچ جۆرێک ئەو مریشکانە نەکەوتونەوە بازاڕەوە.

PUKMEDIA