مەزڵوم عەبدی: کۆبونەوەمان لەگەڵ سەرۆک بافڵ بەرهەمدارو سودبەخش بوو

راگەیاندنی سەرۆکی یەکێتی

سەرۆک بافڵ و مەزڵوم عەبدی و قوباد تاڵەبانی

شەوی رابردوو مەزڵوم عەبدی لە تویتێکدا رایگەیاند، کە کۆبوونەوەکەی لەگەڵ سەرۆک بافڵ بەرهەمدار و سوودبەخش بووە و هاریکاری و هەماهەنگییە هاوبەشەکانی بەهێزتر کردووە، هەروەها رەنگدانەوەی پابەندبوونیانە بە بنیاتنانی پەیوەندییەکی بەهێز.

مەزڵوم عەبدی فەرماندەی گشتیی هێزەکانی سووریای دیموکرات (هەسەدە) لە هەژماری خۆی لە تۆڕی کۆمەڵایەتی (X) لە تویتێکدا بڵاویکردەوە: جێگەی خۆشحاڵیمان بوو کە لەگەڵ بافڵ جەلال تاڵەبانی، سەرۆکی یەکێتیی نیشتمانیی کوردستان، کۆبوونەوەیەکی بەرهەمدار و سوودبەخشمان ئەنجامدا، ئێمە رێز لە شەراکەت و کارکردنی پێکەوەیی دەگرین بۆ دەستەبەرکردنی پاشەڕۆژێکی باشتر بۆ گەلەکەمان، ئەم دیدارە هاریکاری و هەماهەنگییە هاوبەشەکان بەهێزتر دەکات و گوزارشت لە پابەندبوونی ئێمە دەکات بۆ بنیاتنانی پەیوەندییەکی پتەو و بەرهەمدار.

ئەوەشی وتووە: هەر لەو چوارچێوەیەدا، کۆبوونەوەیەکی دیکەمان لەگەڵ تۆم باراک نوێنەری ویلایەتە یەکگرتووەکانی ئەمریکا بۆ کاروباری سووریا، ئەنجامدا و لە کۆبوونەوەکەدا دوایین پەرەسەندنەکانی ناوچەکە و رێککەوتنی ٢٩ی کانوونی دووەم تاوتوێ کران.

فەرماندەی گشتیی هێزەکانی سووریای دیموکرات  ئاماژە بەوەش دەکات: ئەم دیدارە دەرفەتێک بوو بۆ ئاڵوگۆڕی بیروڕا و پێشنیازەکان سەبارەت بە رێگەکانی چەسپاندنی سەقامگیری و ئاسایش لە ناوچەکەدا و کارکردنی پێکەوەیی بۆ رووبەڕووبوونەوەی ئەو تەحەددییانەی کە گەلی سووریا پێیدا تێدەپەڕێت.

PUKMEDIA