وەزارەتی کشتوکاڵ دەنگۆی خراپی بەرهەمە پەلەوەرییەکان رەتدەکاتەوە

ئاژانسەکان

کێڵگەی پەلەوەر

وه‌زاره‌تى كشتوكاڵ و سه‌رچاوه‌كانى ئاو لە بەیاننامەیەکدا لەبارەی بەکارهێنانی ڤاکسینی هەڵە بۆ مریشک رایگەیاند: ئه‌و ده‌نگۆیانه‌ى كه‌ باس له‌ خراپیی به‌كارهێنانى مریشكى كێڵگه‌ په‌له‌وه‌ریه‌كان ده‌كه‌ن، به‌ته‌واوى ڕه‌ت ده‌كه‌ینه‌وه‌، هاووڵاتییانى كوردستان دڵنیا ده‌كه‌ینه‌وه‌ كه‌ به‌رهه‌مى كێڵگه‌ په‌له‌وه‌رییه‌كانى هه‌رێم، له‌ژێر چاودێرىی لیژنه‌ تایبه‌ته‌كانى سه‌ر به ‌وه‌زاره‌تمانه.

وه‌زاره‌تى كشتوكاڵ و سه‌رچاوه‌كانى ئاو لە به‌یاننامه‌یه‌ك بۆ ڕای گشتى و ده‌زگاكانى ڕاگه‌یاندن رایگەیاند: سێكته‌رى په‌له‌وه‌رى له‌ هه‌رێمى كوردستان سه‌رچاوه‌یه‌كى گرنگى به‌هێزبوونى ژێرخانى ئابوورى و به‌كارخستنى هێزى كارە، به‌داخه‌وه‌ ده‌نگۆى به‌كارهێنانى فاكسینى قه‌ده‌غه‌كراو كاریگه‌ریى نه‌رێنى خسته‌ سه‌ر دۆخى ئابووری پڕۆژه‌ و كێڵگه‌ په‌له‌وه‌رییه‌كان.

ئاماژەی بەوەشداوە: مامەڵه‌كردن به‌ ده‌رمان و ڤاكیسنى ڤێتێرنه‌رى له‌ لایه‌ن وه‌زاره‌تمان ڕێك خراوه‌ و ئه‌نجام ده‌درێت، له‌ هه‌مانكاتدا هه‌ر كه‌سێك مامه‌ڵه‌ به‌ ده‌رمانى قه‌ده‌غه‌كراو و بێمۆڵەت بكات و به‌كاریان بهێنێت، له‌لایه‌ن دامه‌زراوه‌ تایبه‌تمه‌ندەکانی حكومه‌ت ده‌ستگیر ده‌كرێن و ڕووبه‌ڕووى سزادانى توند ده‌بنه‌وه‌، هه‌روه‌ها داواكارین له‌ ده‌زگاكانى ڕاگه‌یاندن، به‌ هه‌ستیارییه‌وه‌ مامه‌ڵه‌ له‌گه‌ڵ ئه‌و دۆسییانه‌دا بكه‌ن كه‌ لێكه‌وته‌ى نه‌رێنیی ده‌بێت له‌سه‌ر دۆخى ژیانى خه‌ڵك و دۆخى ئابووری.

ئەوەش هاتووە: ئه‌و ده‌نگۆیانه‌ى كه‌ باس له‌ خراپیی به‌كارهێنانى مریشكى كێڵگه‌ په‌له‌وه‌ریه‌كان ده‌كه‌ن، به‌ته‌واوى ڕه‌ت ده‌كه‌ینه‌وه‌، لێره‌وه‌ سه‌رجه‌م هاووڵاتییانى كوردستان دڵنیا ده‌كه‌ینه‌وه‌ كه‌ به‌رهه‌مى كێڵگه‌ په‌له‌وه‌رییه‌كانى هه‌رێمى كوردستان، له‌ژێر چاودێرىی لیژنه‌ تایبه‌ته‌كانى سه‌ر به ‌وه‌زاره‌تمانه.

PUKMEDIA