جێگری سەرۆکی هەرێم: پاراستنی زمانی کوردی ئەرکێکی نەتەوەییە

PUKMEDIA

شێخ جەعفەر شێخ مستەفا جێگری سەرۆکی هەرێمی کوردستان

شێخ جەعفەر شێخ مستەفا جێگری سەرۆکی هەرێمی کوردستان، لە رۆژی جیهانیی زمانی دایکدا، پیرۆزباییەکی گەرم لە نەتەوەی کورد و کوردستانییان دەکات و جەختیش دەکاتەوە کە پاراستنی زمانی کوردی ئەرکێکی نەتەوەیی و نیشتمانی و مرۆییە.

دەقی پەیامەکەی جێگری سەرۆکی هەرێم:


لە رۆژی جیهانیی زمانی دایکدا، کە ناسنامە و پێناسەی نەتەوەکان دیاری دەکات، پیرۆزباییەکی گەرم لە نەتەوەی کورد و کوردستانییانی ئازیز و گشت پێکهاتە نەتەوەییەکانی کوردستان و عیراق بە گشتیی دەکەین.

لە رۆژی جیهانی زمانی دایکدا، جەخت لە دەوڵەمەندکردنی فەرهەنگی کوردیی و پاراستن و بەرەوپێشبردنی زمانی کوردی دەکەینەوە، چونکە پاراستنی زمانی کوردی ئەرکێکی نەتەوەیی و نیشتمانی و مرۆییە لە سەر گشت تاکێکمان، بۆیە گرنگە هەمووان لە پاراستن و هێشتنەوەیدا بەشدارێکی کارا بین، لە هەمان کاتدا داکۆکیکردن لە زمانی دایک (کوردی) داکۆکیکردنە لە بوونمان، هەروەها فاکتەرێکی سەرەکی و بنچینەیی پاراستنی ناسنامەی نەتەوەییشمانە.

لەم یادەدا، رۆڵی گشت ئەو رۆشنبیر و کەسایەتیی و مامۆستایانەی، کە بەردەوام و بە بایەخێکی زۆرەوە لە خەمی دەوڵەمەندکردنی فەرهەنگ و زمانی کوردیدا بوون، بەرز دەنرخێنین و هەمیشە جێگای رێز و ستایشن.

شێخ جەعفەر شێخ مستەفا
جێگری سەرۆکی هەرێمی کوردستان

PUKMEDIA