کەمئەندامانی سەنگەر خۆپیشاندانیان ئەنجامدا

ئاژانسەکان

خۆپیشاندانی کەمئەندامانی سەنگەر

ئەمڕۆ 15-2-2026 کەمئەندامانی سەنگەر لە سلێمانی بەهۆی پێنەدانی مووچەکانیانەوە خۆپیشاندانیان ئەنجامدا و راشیانگەیاند: سبەینێ دووشەممە خۆپیشاندانی سەرتاسەری ئەنجام دەدەین.

یەکێک لە پێشمەرگە کەمئەندامەکانی سەنگەر بۆ PUKMEDIA وتی: لە مانگی 9ی ساڵی رابردووەوە مووچەمان وەرنەگرتوەو لە ئێستاشدا کە ئاگادار کراوینەتەوە تەنها مووچەی مانگی یەک وەربگرین، رەتمانکردۆتەوەو وەک سەرجەم مووچەخۆرانی دیکە داوای مووچەی مانگی 10ی ساڵی رابردووش دەکەین.

ئەمەش لەکاتێکدایە کەمئەندامانی سەنگەر وەک مووچەخۆرانی هەرێم مووچەی مانگەکانی 11 و 12ی ساڵی رابردوویان پێنەدراوە.

کەمئەندامێکی دیکەی سەنگەر دەڵێت: بەهۆی پێنەدانی مووچەکانمانەوە ئەو موڵک و ماڵەی هەمانبووە بۆ بژێوی خۆمان فرۆشتومانە و پێویستە حکومەتی هەرێم دوو مووچەمان پێبدات، چونکە لەلایەن حکومەتی عیراقەوە مووچەی مانگی 10ی ساڵی رابردوومان نێردراوە، بەڵام حکومەتی هەرێم دابەشی نەکردووە.

رۆژی 11-2-2026 کۆمەڵەی کەمئەندامانی سەنگەر کۆنگرەیەکی رۆژنامەوانییان ئەنجامدا و تێیدا هەتا رۆژی 16-2-2026 بۆ وەزارەتی دارایی دیاریکرد بۆ ئەوەی مووچەی دوو مانگیان بۆ خەرج بکات و بڕیاریاندا لەدوای ئەو وادەیەوە خۆپیشاندانی سەرتاسەری لەهەرێمی کوردستان ئەنجامبدەن.

PUKMEDIA