قوباد تاڵەبانی و محەمەد حەلبووسی: دەبێت حکومەتى نوێ خزمەتی هەموو پێکهاتەکان بکات

نوسینگەى راگەیاندنى قوباد تاڵەبانى

قوباد تاڵەبانی و محەمەد حەلبووسی

وەفدی باڵای یەکێتیی نیشتمانیی کوردستان بە سەرۆکایەتی قوباد تاڵەبانی و پێکهاتوو لە هەر یەکە لە دەرباز کۆسرەت رەسوڵ، خالید شوانی و یوسف گۆران، لە بەردەوامی کۆبوونەوەکانیدا لە بەغداد لەگەڵ محەمەد حەلبووسی، سەرۆکی پارتی تەقەدوم کۆبووەوە.

لە کۆبوونەوەکەدا کە سەرلەئێوارەی ئەمڕۆ شەممە(24/1/2026) بەڕێوەچوو، ئاڵوگۆڕی بیروڕا کرا، لەبارەی چۆنییەتی پێکهێنانی حکومەتی نوێی عیراق.

هەردوولا هاوڕابوون کە دەبێت حکومەتی نوێ لەسەر بنەمای رەزامەندیی و خواست و داواکارییەکانی هەموو پێکهاتەکانی عیراق پێکبهێنرێت و وەک یەک خزمەتی هەموو پێکهاتەکان و هاووڵاتییانی عیراق بکات.

لە بەشێکی دیکەی کۆبوونەوەکەدا، قوباد تاڵەبانی بە ئاماژەدان بە دۆخی ناوچەکە، بە پێویستی زانی لایەنە سیاسییەکانی هەموو پێکهاتەکانی عیراق هاوکار و هەماهەنگ بن و پێکەوە کار بکەن بۆ پاراستنی ئاسایش و سەقامگیری عیراق.

PUKMEDIA