قوباد تاڵەبانی: دەبێت ئەولەوییەتی حکومەتی عیراق و هەرێم چارەسەرکردنی کێشەکانی نێوانیان بێت

نوسینگەى رۆژنامەوانى قوباد تاڵەبانى

قوباد تاڵەبانی و عەمار حەکیم

وەفدی باڵای یەکێتیی نیشتمانیی کوردستان بە سەرۆکایەتیی قوباد تاڵەبانی و ئامادەبوونی هەر یەکە لە دەرباز کۆسرەت رەسوڵ، خالید شوانی و یوسف گۆران، لە بەردەوامی سەردان و کۆبوونەوەکانیدا لە بەغداد، لەگەڵ عەمار حەکیم، سەرۆکی رەوتی حیکمە کۆبووەوە.

لە کۆبوونەوەکەدا کە ئەمڕۆ شەمە(24/1/2026) بەڕێوەچوو، هەردوولا بۆچوون و دیدگای خۆیان بۆ حکومەتی داهاتووی عیراق خستەڕوو و هاوڕابوون لەسەر پەلەکردن لە دروستکردنی کۆدەنگییەک لە نێوان لایەنە سیاسییەکانی هەموو پێکهاتەکان بۆ ئەوەی هەرچی زووتر حکومەتی نوێ پێکبهێنرێت.

قوباد تاڵەبانی روونی کردەوە، کە یەکێتی پێداگرە لەسەر ئەوەی دەبێت ئەولەوییەتی هەردوو حکومەتی داهاتووی عیراق و هەرێم چارەسەرکردنی کێشەکانی نێوانیان بێت و بە تایبەتیش کێشەی بودجە کە مافێکی دەستووری خەڵکی هەرێمی کوردستانە و نابێت بخرێتە چوارچێوەی ململانێ و ناکۆکییە سیاسییەکانەوە.

PUKMEDIA