سودانی بۆ مەزڵوم عەبدی: بە دیالۆگ کێشەکان چارەسەر بکرێت

راگەیاندنی سەرۆکوەزیرانی عیراق

مەزڵوم عەبدی و سودانی

محەمەد شیاع سودانی سەرۆکوەزیرانی عیراق، لە پەیوەندییەکی تەلەفۆنیدا لەگەڵ مەزڵوم عەبدی فەرماندەی گشتی هێزەکانی سوریای دیموکرات، دووپاتیکردەوە کە دیالۆگ گەرەنتی یەکگرتوویی سوریایە و ڕێگایەکە بۆ ڕێگریکردن لە گەڕانەوەی تیرۆر.

بەپێی  نووسینگەی ڕاگەیاندنی سەرۆکوەزیرانی عیراق، محەمەد شیاع  سودانی، سەرۆکوەزیرانی عیراق پەیوەندییەکی تەلەفۆنی لەگەڵ مەزڵوم عەبدی فەرماندەی  گشتی هێزەکانی سوریای دیموکرات ئەنجامدا، لە میانی پەیوەندییەکەدا باسیان لە پێشهاتەکانی سوریا کرد لە ژێر ڕۆشنایی ڕووداوە ئەمنییەکانی ئەم دواییە و کاریگەریان لەسەر ئاسایش و سەقامگیری ناوچەکە و عیراق.

بەپێی راگەیەندراوەکە، سەرۆکوەزیرانی عیراق، جەختی لە پێویستی دیالۆگ لەم کاتە هەستیارەدا کردووەتەوە، بەشێوەیەک کە مافەکانی هەموو پێکهاتەکانی سوریا دەستەبەر بکات و  یەکڕیزی و ئاسایشی وڵات بپارێزێت، هەروەها ڕێگری بکات لە هەڵهاتنی تیرۆریستان لە زیندانەکان و تێکدانی ئاسایش و سەقامگیری سوریا و عیراق و ناوچەکە بە گشتی.

PUKMEDIA