ناوی کاندیدانی پۆستی سەرۆککۆمار بڵاو کرایەوە

سەرۆکایەتی کۆمار

سەرۆکایەتی کۆمار

ئەنجومەنی نوێنەرانی عیراق، ناوی كاندیدانی بۆ پۆستی سەرۆككۆمار  بڵاوكردەوە، کە 15 کاندید ناوەکانیان پەسەند کراوە و نزار ئامێدی ناوەکەی پەسەند کراوە و تاكە كاندیدی یەكێتییەو بە هێزترین كاندیدە بۆ پۆستی سەرۆك كۆماری عیراق.

 ئەنجومەنی نوێنەرانی عیراق، لە راگەیەندراوێکیدا ئاماژەی بەوەکردووە: بە پشتبەستن بە بڕگەی مادەی (4) لە یاسای کاندیدانی پۆستی سەرۆکایەتی کۆمار ژمارە 8 ی ساڵی 2012 ،ژمارەی ئەو کاندیدانەی کە مەرجەکانی کاندیدبوونیان بۆ پۆستی سەرۆککۆمار  تێدایە گەیشتووەتە 15 کەس، کە لە ناویاندا ( نزار محەمەد سەعید محەمد كنجی ) ناسراو بە " نزار ئامێدی "ی تێدایە، کە تاکە کاندیدی یەکێتیی نیشتمانیی کوردستانە.

رۆژی 5ی1ی2026، یەکێتیی نیشتمانیی کوردستان، نزار ئامێدی وەک تاکە کاندیدی خۆی بۆ پۆستی سەرۆک کۆمار دیاریکرد.

ئەنجوومەنی نوێنەران لە راگەیەندراوەکەیدا ئاماژەی بەوەشکردووە: هەر کەسێک وەک کاندید ناوی خۆی تۆمار کردووە ،بەڵام ناوی لەم لیستەدا نییە، ئەوە دەتوانێت لە ماوەی سێ رۆژدا لە دادگای فیدڕاڵی سکاڵا تۆمار بکات.


PUKMEDIA