هاوسەرۆكی دەم پارتی: لەحەلەب هەوڵی دووبارەكردنەوەی هەڵەبجە درا

ميدياكان

تونجەر باكرهان، هاوسەرۆكی پارتی یەكسانی و دیموكراسیی گەلان (دەم پارتی)

هاوسەرۆكی پارتی یەكسانی و دیموكراسیی گەلان (دەم پارتی) رایگەیاند: لەحەلەب هەوڵی دووبارەكردنەوەی هەڵەبجە درا، دەشڵێت: هەركەسێك بۆ غەززە بگری و بۆ حەلەب چەپڵە لێبدات، دوژمنێكی سەرسەختی كوردە.

تونجەر باكرهان، هاوسەرۆكی پارتی یەكسانی و دیموكراسیی گەلان (دەم پارتی)، لەكۆبوونەوەی فراكسیۆنی پارتەكەیدا لە پەرلەمانی توركیا، سەرنجی خستە سەر هێرشی هێزەكانی سەر بەحكومەتی شام بۆ سەر گەڕەكە كوردنشینەكانی حەلەب و رووداوەكانی بە هەڵەبجە چوواند و وتی: لە حەلەب، كۆمەڵكوژییەكی بێدەنگ ئەنجام درا.

ئاماژەی بەوەشدا: كێشەی سووریا كورد نییە كە بەرگری لەخاكەكەی دەكات، عەلەویی و درووزەكانيش نین، كێشەی سووریا تێگەیشتنی فەرمانڕەوایەتیی سەلەفی، تاكڕەو و رەگەزپەرستانەیە، ئەوەی بەرامبەر بەفڕێدانەخوارەوەی ژنە شەڕڤانێك لەحەلەب بێدەنگ بوو، هاوكات پشتیوانیی لەئەنجامدەرانی ئەم وەحشیگەرییە كرد، رووی رۆژ نابینێت، ناتوانن بەكۆمەڵكوژ كردنی كورد، رژێمە رووخاوەكانتان لەسەر پێ بهێڵنەوە و پیلانە سیاسییەكانتان جێبەجێ بكەن، چونكە ئێمە رێگە بەوە نادەین.

PUKMEDIA