وردبینی لە کاندیدانی پۆستی سەرۆککۆمار بەردەوامە

سەرۆکایەتی کۆمار

سەرۆکایەتی کۆمار

ژمارەی کاندیدان بۆ پۆستی سەرۆککۆماری عیراق گەیشتە 81 کاندید و ئەمینداری گشتی ئەنجومەنی نوێنەرانیش رایدەگەیەنێت وردبینی لە ژیاننامەی کاندیدەکان بەردەوامە.

صەفوان گەرگەری ئەمینداری گشتی ئەنجومەنی نوێنەرانی عیراق لە لێدوانێکیدا رایگەیاند: ژمارەی ئەو کەسانەی خۆیان بۆ پۆستی سەرۆککۆمار کاندید کردووە، گەیشتووەتە 81 کاندید.

دەشڵێت: پرۆسەی وردبینکردنی ناوی کاندیدەکان و ژیاننامەیان بەردەوامە و تاوەکو ئێستا نەگەیشتووەتە ژمارەی کۆتایی.

 ئەمەش لەکاتێکدایە، ئەنجومەنی نوێنەرانی عیراق لە دانیشتنی یەکەمی خولی شەشەمدا لە رۆژی 30ی12ی2025دا، دوای  دەستبەکاربوونی دەستەی سەرۆکایەتی، بۆ ماوەی سێ رۆژ دەرگای خۆکاندید کردنی بۆ پۆستی سەرۆککۆمار کردەوە و یه‌كێتیی نیشتمانیی كوردستان-یش لە رۆژی 5ی1ی2026 كاندیدی خۆی بۆ پۆستی سه‌رۆككۆماری عیراق راگه‌یاند و نزار ئامێدی كرده‌ تاكه‌ كاندید بۆ وه‌رگرتنی ئه‌و پۆسته‌.

PUKMEDIA