سزای ساڵێك و پێنج مانگ زیندانی بەسەر دەمیرتاش-دا سەپێندرایەوە

ئەرشیف

سەلاحەدین دەمیرتاش

دادگای سزای ئەسڵییەی مێرسین سزای ساڵێك و پێنج مانگ و 15 رۆژ زیندانیكردنی بەسەر سەلاحەدین دەمیرتاش-دا سەپاندەوە.

ئەمڕۆ 6ی1ی2026 دادگای سزای ئەسڵییەی مێرسین، بە تۆمەتی "سووكایەتیكردن بە سەرۆككۆمار"، سزای ساڵێك و پێنج مانگ و 15 رۆژ زیندانیكردنی بەسەر سەلاحەدین دەمیرتاش، هاوسەرۆكی پێشووتری پارتی دیموكراتی گەلان (هەدەپە)دا سەپاند.
 
ئەمڕ‌ۆ دانیشتنی دادگا بۆ بڕ‌یاردان لەو دۆسیەیەدا بەڕ‌ێوەچوو كە تێیدا سەلاحەدین دەمیرتاش بەهۆی وتارەكانی لەنێوان ساڵانی 2015 بۆ 2016، بەتۆمەتی 'سووكایەتیكردن بە سەرۆككۆمار' دادگایی دەكرا، دادگاكە بە پاساوی ئەوەی دەمیرتاش لە وتارەكانیدا لەشارەكانی مێرسین و ئامەد، تاوانی 'سووكایەتیكردن بە سەرۆككۆمار'ی ئەنجامداوە، سزای ساڵێك و پێنج مانگ و 15 رۆژ زیندانیكردنی بۆ بڕ‌ییەوە.
 
پارێزەرانی دەمیرتاش ئاماژەیان بەوە كرد، بەهۆی ئەو داواكارییانەی لە دانیشتنی پێشوودا پێشكەشی دادگایان كردبوو، نەیانتوانیوە بەرگرییەكانیان لەدژی رای داواكاری گشتی ئامادە بكەن، بۆیە داوای مۆڵەتی زیاتریان كرد، بەڵام دادوەر بەو پاساوەی كە پێشتر كاتی پێویست دراوە، داواكارییەكەی رەتكردەوە.
 
لەسەر ئەم بڕ‌یارە، پارێزەران رایانگەیاند، مافی دادگاییكردنی دادپەروەرانە پێشێلكراوە و داوای رەتكردنەوەی دادوەریان كرد، بەڵام ئەم داواكارییەش لەلایەن دادوەرەوە پەسند نەكرا.

PUKMEDIA