خانمی یەكەم: ئەوەی لەبەسرە روویدا دەستدرێژییە بۆ سەر شكۆی ژنان

PUKMEDIA

شاناز ئیبراهیم ئەحمەد، خانمی یەكەمی عیراق

شاناز ئیبراهیم ئەحمەد، خانمی یەكەمی عیراق، لەسەر رووداوی هەراسانكردنی كچێك لەبەسرە، پەیامێكی بڵاوكردەوە و رایگەیاند: ئەم رەفتارە لەگەڵ بەهاو كلتور و ئایندەماندا ناگونجێت و زۆر توڕە و نیگەرانم، ئەوەی روویدا دەستدرێژیی راستەوخۆیە بۆ سەر شكۆی ژنان و بێدەنگ بوونیش لێی، بەشداربوونە لەتاوانەكە. 

دەقی پەیامەكە:

زۆر توڕە و نیگەرانم  بە هەواڵی هەراسانكردنی كچێك لە كۆرنیشی بەسرە لەمیانی ئاهەنگەكانی شەوی سەری ساڵی زاینیدا. 

ئەوەی روویدا شەرمەزاریی و دەستدرێژییەكی راستەوخۆیە بۆ سەر شكۆی ژنان و كچان و مافە سەرەكییەكانیان.

ئەم رەفتارە هیچ پاساوێك هەڵناگرێت، چونكە هەراسانكردن توندوتیژییە و بێدەنگ بوونیش لێی، بەشداربوونە لەتاوانەكە. 

خۆشحاڵم بەدەستگیركردنی تاوانباران، پێشبینی سەپاندنی سزای یاسایی توند و شەفاف دەكەم، چونكە لێپرسینەوە زۆر پێویستە ئەگەر بەڕاستی پابەندی پاراستنی كۆمەڵگە و شوێنە گشتییەكانمانین. 

ئەم رەفتارە هیچ لەگەڵ بەها و كلتور و ئایندەماندا ناگونجێت.

PUKMEDIA