خاتوو شاناز: ساڵی نوێ مایەی خۆشگوزەرانی و کامەرانی بێت بۆ گەلەکەمان

PUKMEDIA

شاناز ئیبراهیم ئەحمەد

خاتوو شاناز ئیبراهیم ئەحمەد خانمی یەکەمی عێراق پەیامی پیرۆزبایی ساڵی نوێی بڵاوکردەوە، رایگەیاند: هیوام وایە خۆشگوزەرانی و ئاوەدانی و ئاسودەیی روو لە وڵاتەکەمان بکات و هەمووان بە ئاشتی بژین.

کەئەمە دەقەکەیەتی: 

بە ئومێد و هیوایەکی زۆرەوە ئەڕوانمە دەستپێکی ساڵێکی نوێ و بەگەرمی پیرۆبایی لە هەموو گەلانی عێراق ئەکەم. 
ساڵی ٢٠٢٥مان بە هەموو خۆشی و ناخۆشییەکانەوە بەڕێکرد. ناچینە ساڵی نوێوە ئەگەر درود بۆ قوربانییەکانمان نەنێرین.

لە بەردەم ساڵی نوێدا، هێشتا دڵم لای لێقەوماوانی کارەساتە سروشتییەکەی چەمچەماڵە و هیوادارم لە ٢٠٢٦دا  کەمێک لە خەم و ئازاریان بڕەوێتەوە. 

لەگەڵ ئەوەی لە عێراق بەرەو پێکهێنانی حکومەتێکی نوێ هەنگاو ئەنێین، بەڵام بە داخەوە لە هەرێمی کوردستان ئەمساڵمان بە بێ حکومەتی نوێ و پەرلەمانی نوێ تێپەڕاند. تەمەننا ئەکەم تەمەنی ئەم بێ پەرلەمانی و بێ حکومەتییە لە هەرێم بەزوویی کۆتایی بێت و بەربەستەکانی بەردەم پێکهێنانی حکومەتی هەرێم نەمێنن.

ئاواتەخوازم ساڵی نوێ پڕۆسەی چارەسەری لە تورکیا بەئەنجام بگات و ئاشتی باڵ بەسەر ناوچەکەدا بکێشێت. 

لە خوا ئەپاڕێمەوە خوشک و برایانمان لە رۆژئاوای کوردستان، کە داعشیان وەک گەورەترین دوژمنی مرۆڤایەتی تێکشکاند، لەساڵی نوێدا بە سەربەرزی و بە ئارامی و ئاشتی لەگەڵ هەموو گەلانی ئەو وڵاتە بژین.

هەروەها هیوادارم گەلانی ئێران و بەتایبەت خوشک و براکانم لە رۆژهەڵات لەو هەموو میحنەتەی تێی کەوتوون بەتایبەت میحنەتی گرانی و باری سەختی ئابوری و دژواری ژیان ، رزگار ببن.

بەداخەوە ئەم یەک دوو ساڵە شەڕێکی نەگریس بەرۆکی ناوچەکەی گرتووە و لە ئەنجامدا هەزاران منداڵ لە غەزە و  لە رۆژئاوای کوردستان و زۆر شوێنی تر ، شەهید یان بریندار، یان بێ خانە و لانە بوون. ناکرێ دڵمان لای ئەو منداڵانەش نەبێت و  ئومێدی ئەوە نەخوازین کە ئەمساڵە نوێیە، مژدەی ئارامی و ئاسودەیی بۆ ئەوان و  بۆ هەموو جیهان و نەتەوەکانی تر پێ بێت. 

بۆ ساڵی نوێ هیوام وایە خۆشگوزەرانی و ئاوەدانی و ئاسودەیی روو لە وڵاتەکەمان بکات و هەمووان بە ئاشتی بژین.

جارێکیتر هاتنی ساڵی نوێ پیرۆز بێت.

PUKMEDIA


شاناز ئیبراهیم ئەحمەد