د.بڕیار رەشید: گەڕی سێهەم بۆ هەڵبژاردنی جێگری دووەمی سەرۆكی پەرلەمان دەستیپێكرد

راگەیاندنی ئەنجومەنی نوێنەرانی عیراق

ئەنجومەنی نوێنەرانی عیراق

جارێكی دیكە دەرگای خۆپاڵاوتن بۆ پۆستی جێگری دووەمی سەرۆكی ئەنجومەنی نوێنەرانی عیراق كرایەوە و شاخەوان عەبدوڵڵا لە كاندید بوون كشایەوە و لەئێستادا د. رێبوار كەریم و فەرهاد ئەتروشی كاندیدن بۆ وەرگرتنی ئەو پۆستە، ئەندامێكی فراكسیۆنی یەكێتیش دەڵێت: دەنگی فراكسیۆنەكەمان بۆ فەرهاد ئەتروشی دەبێت.

د. بڕیار رەشید، ئەندامی ئەنجومەنی نوێنەرانی عیراق، بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: كەمێك پێش ئێستا بەكۆی دەنگی ئەندامانی ئەنجومەن، بڕیاردرا جارێكی دیكە دەرگای خۆپاڵاوتن بۆ پۆستی جێگری دووەمی سەرۆكی ئەنجومەنی نوێنەرانی عیراق بكرێتەوە و شاخەوان عەبدوڵڵا لە كاندید بوون كشایەوە و لەشوێنی ئەو فەرهاد ئەمین سەلیم ناسراو بە فەرهاد ئەتروشی بۆ ئەو پۆستە پاڵێورا، لەئێستاشدا د. رێبوار كەریم و فەرهاد ئەتروشی كاندیدن بۆ وەرگرتنی ئەو پۆستە.

راشیگەیاند: لە ئێستادا دەنگدانی نهێنی بۆ یەكلا كردنەوەی ئەو پۆستە دەستیپێكردووە، ئەمەش لەكاتێكدایە بۆ گۆڕانكاری لە كاندیدەكانی ئەو پۆستە پەیڕەوی ناوخۆ هەموار كراوەتەوە.

هاوكات هەرێم كەمال ئاغا، ئەندامی ئەنجومەنی نوێنەرانی عیراق لە فراكسیۆنی یەكێتی،  بە PUKMEDIA ی راگەیاند: دەنگی فراكسیۆنی یەكێتیی نیشتمانیی كوردستان بۆ فەرهاد ئەتروشی دەبێت.

PUKMEDIA