یەمەن باری نائاسایی راگەیاند و داواشی کرد ئیمارات خاکەکەی جیهێڵێت

سەرۆکایەتی یەمەن

رەشاد عەلیمی سەرۆکی ئەنجومەنی سەرکردایەتی یەمەن

رەشاد عەلیمی سەرۆکی ئەنجومەنی سەرکردایەتی یەمەن باری نائاسایی لە وڵاتەکەی راگەیاند و تەواوی سنووری وڵاتەکەی داخست و داوای لە ئیماراتیش کرد بە زووترین کات خاکی وڵاتەکەی جێبهێڵێت.

 کەمێک پێش ئێستا رەشاد عەلیمی، رێککەوتنامەی هاوبەشی بەرگری لەگەڵ ئیمارات هەڵوەشاندەوە و داواشی لەو وڵاتە کرد لە ماوەی 24 سەعاتدا تەواوی هێزەکانی لە یەمەن بکێشێتەوە.
هاوکات، باری نائاسایی لە تەواوی وڵات بۆ ماوەی 90 رۆژ راگەیاند و بەپێی ماڵپەڕی ئاژانسی سەبا، ئەگەری هەیە ماوەکە درێژ بکرێتەوە.

هەر بەپێی بڕیارەکانی سەرۆکی ئەنجومەنی سەرکردایەتی سەرۆکایەتی یەمەن، تەواوی سنوورەکانی وڵات بە وشکانی و ئاوی و ئاسمانییەوە بۆ ماوەی 72 سەعات دادەخرێت.
ئەم کاردانەوەی یەمەن دوای ئەوە دێت، کە لیوا تورکی مالیکی وتەبێژی هێزی هاوپەیمانان رایگەیاند: رۆژانی شەممە و یەکشەممە دوو کەشتی لە بەندەری فەجیرەوە بۆ بەندەری مەکلا بەڕێکەوتوون بەبێ ئەوەی مۆڵەتی رەسمیان هەبێت، هەروەها هەردوو کەشتییەکە سیستمی دیاریکردنی شوێنیان کوژاندووەتەوە و ژمارەیەکی زۆری چەکیان بۆ پاڵپشتی لە هێزەکانی ئەنجومەنی راگوزەری باشور گواستووەتەوە.

 دەشڵێت: بۆ پاراستنی هاووڵاتیان سڤیل، سەرلەبەیانی ئەمڕۆ لە هێرشێکی ئاسمانیدا تەواوی ئەو چەکانە بە ئامانج گیران و دواتریش ئۆپراسیۆنی سەربازی ئەنجامدراوە.

PUKMEDIA